Tveir greindust með veiruna og fjölgar um hundrað í sóttkví

Tveir greindust með kórónuveiruna hér á landi síðasta sólarhringinn; einn við landamæraskimun og hinn á sýkla- og veirufræðideild Landspítala, samkvæmt tölum á Covid.is sem uppfærðar voru klukkan ellefu nú í morgun. Tólf virk smit eru nú á landinu en voru ellefu í gær. 443 eru í sóttkví og fjölgar þar um rúmlega hundrað milli daga. Staðfest smit frá upphafi faraldurs eru 1840.

Innanlandssmit frá 15. júní eru nú orðin fimm. Tuttugu og tvö smit má rekja til útlanda en þrjú eru skráð með óþekkt upprunaland á Covid.is. 

Samkvæmt þessum tölum hafa alls þrjátíu greinst með veiruna frá 15. júní. Þó ber að geta að aðeins fjórir af þeim tuttugu og tveimur sem greinst hafa við landamæraskimun eru smitandi. Nítján eru með svokölluð gömul smit og eru ekki smitandi.

Tekin voru 1365 sýni við landamæraskimun síðasta sólarhringinn og 234 hjá Íslenskri erfðagreiningu. Sextán sýni voru tekin á veirufræðideild Landspítala.