Fjórir greindust með veiruna við landa­mærin

Fjórir greindust með kórónuveiruna við landamærin síðasta sólarhringinn. Þrír eru með mótefni við veirunni og því ekki smitandi en einn bíður eftir mótefnamælingu.

Sautján eru nú í einangrun með virk smit á landinu og fækkar um einn síðan í gær. Þá fækkar mjög í sóttkví milli daga; í sóttkví eru nú 139 en voru 198 í gær. Staðfest smit frá upphafi faraldurs hér á landi eru nú 1.886 og er 1.859 batnað.

Alls hafa tólf ferðamenn greinst með virk smit á landamærum frá því að skimanir hófust þar 15. júní. Innanlandssmit á sama tímabili eru enn alls 11 og hefur slíkt smit ekki greinst síðan 2. júlí. Þá voru 2.159 sýni tekin á landamærum í gær og 141 á sýkla- og veirufræðideild Landspítala.