Veðurstofan spáir vaxandi suðaustanátt í dag með rigningu, hvassviðri eða stromi sunnan- og vestanlands eftir hádegi, fimmtán til 23 metrum, en hægari vindi annars staðar. Lengst af verður þurrt norðaustantil á landinu.
Reikna má með að hitinn verði á bilinu fjögur til tíu stig, hlýjast syðst. „Lægir seint í kvöld, dregur úr úrkomu og kólnar. Fremur hæg suðlæg átt á morgun en strekkingur með vesturströndinni. Él eða slydduél og hiti um og yfir frostmarki en að mestu þurrt um norðanvert landið og víða vægt frost.
Áfram suðlæg átt á sunnudag og víða él, en snýst í norðanátt í byrjun næstu viku og léttir til um sunnanvert landið,“ segir í hugleiðingum veðurfræðings.
Á vef Vegagerðarinnar segir að aðalleiðir séu mikið til auðar en sums staðar sé hálka á fáfarnari vegum. Talsvert sé um skemmdir vegna hlýinda og víða slæmar holur í bundnu slitlagi. Eins hefur víða þurft að takmarka ásþunga í því viðkvæma ástandi sem skapast þegar frost er að fara úr jörð.
Snjóþekja og éljagangur er á Steingrímsfjarðarheiði, aðrar leiðir er að mestur greiðfærar þó eru hálkublettir á nokkrum fjallvegum.
Veðurhorfur á landinu næstu daga
Á laugardag: Sunnan og suðaustan 10-18 m/s, hvassast við vesturströndina. Slydduél eða él, en að mestu þurrt norðanlands. Hiti 0 til 4 stig, en vægt frost í innsveitum fyrir norðan.
Á sunnudag: Suðaustan og austan 3-8 og él, en þurrt norðantil á landinu. Norðaustan 10-15 og dálítil snjókoma á Vestfjörðum um kvöldið. Frost 0 til 5 stig.
Á mánudag og þriðjudag: Norðlæg átt, víða 5-10 m/s, og él eða snjókoma norðan- og austanlands. Yfirleitt úrkomulaust á sunnanveðru landinu, þó líkur á stöku éljum allra syðst. Frost um land allt.
Á miðvikudag: Austan og norðaustanátt og dálítil él, en úkromulítið vestanlands. Kalt í veðri.
Á fimmtudag: Austlæg átt, dálítli snjókoma og vægt frost, en þurrt um norðvanvert landið og talsvert frost.
