Ríkið fær veð í vörumerki og lendingarheimildum Icelandair gangi félagið á ríkisábyrgðina

Fari svo að Icelandair Group þurfi að ganga á lánalínuna sem íslenska ríkið hyggst ábyrgjast fyrir félagið er miðað við að ríkið fái veð í vörumerki Icelandair Group og Icelandair, vefslóð sömu félaga, bókunarkerfi Icelandair sem og lendingarheimildum í London og New York, ef unnt reynist að taka veð í lendingarheimildum.

Þetta er á meðal þess sem kemur fram í frumvarpi Bjarna Benediktssonar, fjármála- og efnahagsráðherra, til fjáraukalaga, sem lagt hefur verið fram á Alþingi. Þar er aðeins lögð til ein breyting á fjárlögum, að veita Icelandair Group sjálfskuldarábyrgð frá ríkissjóði á lánum vegna tekjufalls fyrirtækisins í tengslum við heimsfaraldur kórónuveirunnar.

Stjórnvöld samþykktu á dögunum að veita Icelandair ríkisábyrgð á lánalínu sem nemur allt að 120 milljónum Bandaríkjadala. Það samsvarar um 15 milljörðum íslenskra króna að því er fram kemur í frumvarpinu, en ríkisábyrgðin er háð samþykki Alþingis. Heildarskuldbinding ríkissjóðs getur þó aðeins numið allt að 108 milljónum Bandaríkjadala eða sem jafngildir 90 prósent af 120 milljóna Bandaríkjadala lánalínum til félagsins.

Ríkið setur ýmsa varnagla

Í frumvarpinu er farið ítarlega yfir það hvernig málið horfir við íslenskum stjórnvöldum. Þar segir meðal annars að lánalínan með ábyrgð ríkissjóðs sé aðeins til þrautavara og að í því felist að ekki reyni á hana nema upp komi þær aðstæður að rekstur Icelandair gangi talsvert verr en áætlanir gera ráð fyrir.

Icelandair hefur sem kunnugt er tilkynnt að stefnt sé að hlutafjárútboði þar sem safna á allt að 23 milljörðum króna, og gerir áætlanir félagsins ráð fyrir því að rekstur Icelandair til næstu tveggja ára verði að fullu fjármagnaður, án þess að gert séð ráð fyrir að dregið verði á lánalínuna sem íslenska ríkið ábyrgist. Í frumvarpinu segir meðal annars eftirfarandi:

Er lánalínu með ábyrgð ríkisins ætlað að skapa aukið rekstraröryggi fyrir félagið, sem ætti að hafa jákvæð áhrif á vilja fjárfesta til að leggja félaginu til nýtt fé.

Ríkið setur þar að auki ýmsa varnagla þurfi félagið að draga á lánalínuna. Í fyrsta lagi eru mörk á mánaðarlegri úttekt félagsins 20 milljónir Bandaríkjadala og hins vegar eru mörk við eiginfjárhlutfall tvö prósent eða 25 milljónir Bandaríkjadala, um 3,4 milljarðar.

Íslenska ríkið myndi eignast vefsíðu Icelandair við gjaldþrot hafi reynt á lánalínuna

Í frumvarpinu segir að fyrri mörkin leiði til þes að það þurfi alltaf að lágmarki sex mánuði af ádrætti til þess að klára línuna og seinni mörkin koma í veg fyrir að félagið geti dregið á línuna ef rekstur þess hefur gengið það illa að eigið fé félagsins er að klárast.

„Að auki er miðað við að ríkið taki veð í eignum félagsins til tryggingar endurgreiðslu reyni á ábyrgð þess. Um er að ræða veð í vörumerki félagsins og dótturfélagsins Icelandair ehf., vefslóð sömu félaga og lendingarheimildum í London og New York, ef unnt reynist að taka veð í lendingarheimildum.“

Með öðrum orðum, ef Icelandair verður gjaldþrota myndu „lykileignir félagsins (vörumerki, bókunarkerfi og e.a. lendingarheimildir) renna til ríkisins sem hægt væri að nýta til að bregðast við þeirri óvissu sem slíkt gjaldþrot myndi fela í sér gagnvart flugsamgöngum til og frá landinu,“ líkt og það er orðað í frumvarpinu. Lendingarheimildir flugfélaga á vinsælum áfangastöðum eru oftar en ekki á meðal verðmætustu eigna þeirra.

Má ekki greiða út arð á meðan lánalínan er útistandandi

Þá kemur einnig fram að félaginu sé aðeins heimilt til að nota lánalínurnar til þess að að standa skil á almennum rekstrarkostnaði félagsins. Það geti ekki nýtt sér lánalínuna til þess að fjárfesta eða endurfjármagna núverandi skuldbindingar, auk þess sem að óheimilt verður að greiða arð til hluthafa félagsins á meðan lánalínan er útistandandi.

Þurfi félagið að nýta sér lánalínua setur ríkið einnig það skilyrði að leyfi rekstur félagsins að greiða lánið hraðar niður skuli það gert. Til að tryggja það verður ákvæði í samningnum sem skyldar félagið til að nota umframlausafé til að greiða niður lánið. Miðað er við að 75 prósent af umframlausafé á hverjum tíma fari til lækkunar á skuld samkvæmt lánalínunni.

Skoða má frumvarpið í heild sinni hér en sem fyrr segir þarf samþykki Alþingis áður en ríkið ábyrgist umrædda lánalínu.