Flug­freyjur í skert starfs­hlut­fall

Flugfreyjur og flugþjónar Icelandair verða í 75% starfshlutfalli næstu átta mánuði. Þetta staðfestir Guðlaug Líney Jóhannsdóttir, formaður Flugfreyjufélags Íslands, í samtali við Vísi.

Ákvörðun um þetta var tekin í samráði við stjórnendur flugfélagsins í síðustu viku, til þess að forðast að til hópuppsagna kæmi hjá flugfélaginu vegna stöðunnar sem nú er uppi í ferðaþjónustu hér á landi. Allir sem hingað til lands koma þurfa nú að sæta tvöfaldri skimun fyrir kórónuveirunni og fimm daga sóttkví á milli.

Frá því reglurnar tóku gildi 19. ágúst hefur komufarþegum hingað til lands fækkað umtalsvert og fyrirtæki í ferðaþjónustu sjá mörg hver fram á erfiðan vetur.

Einróma afstaða starfsfólks

Í samtali við Vísi segir Guðlaug Líney að málið hafi ekki verið í höndum Flugfreyjufélagsins. Hver starfsmaður hafi sjálfur þurft að samþykkja að skerða starfshlutfall sitt.

Hún segir þó að einróma samstaða hafi náðst meðal starfsfólks um ákvörðunina, sem hafi verið tekin með það fyrir augum að forða hópuppsögn starfsfólks. Guðlaug bendir þá á að í ákvæðum laga um hópuppsagnir sé kveðið á um að leita skuli leiða til að forðast slíkar uppsagnir, sé þess kostur.