Gular við­varanir vestan­lands og á há­lendinu

Veðurstofan hefur gefið út gular viðvaranir fyrir Faxaflóa, Breiðafjörð, Vestfirði og Miðhálendið í dag sem spáð er hvassviðri. Viðvaranirnar gilda frá um og eftir hádegi í dag og fram á kvöld, nema fyrir Miðhálendið þar sem viðvörunin gildir fram í fyrramálið.

Í hugleiðingum veðurfræðings á vef Veðurstofunnar segir að skil séu byrjuð að ganga yfir landið og nú i morgunsárið sé farið að hvessa af suðri vestast á landinu. Áfram verði vaxandi sunnanátt á landinu og muni vindur ná stormstyrk á nokkrum stöðum vestanlands og á miðhálendinu, einkum á norðanverðu Snæfellsnesi og norðan jökla. Er spáð 15-23 metrum á sekúndu með hvössum vindstrengjum við fjöll, 25-35 metrum á sekúndu.

„Skilunum fylgir einnig rigning, einkum sunnan- og vestantil, en þó mun einhver dálítil væta ná inná norðausturland. Í kvöld snýst síðan í hægari suðvestanátt með skúrum, en léttir til austantil í nótt og fyrramálið.

Fram að helgi er útlit fyrir suðvestan strekkingsvind og áframhaldandi skúrir um landið vestanvert en bjartviðri austanlands. Seinnipart sunnudags er síðan von á myndarlegri lægð að landinu og með henni allhvöss sunnanátt og rigning en er lægðin fikrar sig norðaustur yfir landið þá snýst í norðanátt og slyddu eða snjókomu norðanlands.“

Veðurhorfur á landinu næstu daga

Á fimmtudag: Suðvestan 5-13 m/s og rigning eða skúrir, en þurrt og bjart að mestu austantil á landinu. Hiti 7 til 13 stig, hlýjast á Norðausturlandi.

Á föstudag: Suðvestlæg átt, 8-15 m/s og smáskúrir vestantil, en hægari vindur og léttskýjað um landið austanvert. Hiti breytist lítið. 

Á laugardag: Suðvestan 10-18 m/s. Rigning með köflum sunnan- og vestanlands, en hægari vindur, bjartviðri og úrkomulítið norðaustan- og austanlands. Áfram milt í veðri.

Á sunnudag: Vaxandi sunnanátt með rigningu, víða allhvass vindur um kvöldið. Hiti 6 til 10 stig.

Á mánudag: Líklega hvöss suðvestlæg eða breytileg átt og rigning um allt land. Útlit fyrir norðlæga átt og slyddu eða snjókomu norðvestantil um kvöldið. Kólnandi veður.

Á þriðjudag (haustjafndægur): Útlit fyrir stífa norðlæga átt með slyddu eða snjókomu norðantil, en þurrt að kalla sunnanlands.