Einn sjúklingur lést á Landspítala síðasta sólarhring vegna Covid-19. Þetta kemur fram á vef Landspítala. Spítalinn vottar fjölskyldu hans samúð, að því er segir í tilkynningu. Ekki kemur þar fram á hvaða aldri sjúklingurinn var eða hversu lengi hann hafði legið inni á spítalanum.
Þetta er ellefta andlátið af völdum Covid-19 hér á landi en það fyrsta í bylgjunni sem nú gengur yfir. Tíu létust í fyrstu bylgju faraldursins í vor.
Uppfært klukkan 12:03
Um var að ræða aldraða konu en hún var ekki á gjörgæslu þegar hún lést, að sögn Más Kristjánssonar yfirlæknis á smitsjúkdómadeild Landspítalans.
