Tryggja fjármagn til að færa íslenska skálann á aðalsvæði Feneyjartvíæringsins

Ákveðið hefur verið að færa sýningarsvæði Íslands á Feneyjartvíæringnum 2022 á aðalsvæði hátíðarinnar og hefur mennta- og menningarmálaráðuneyti tryggt fjármagn til þess. Þetta kemur fram í tilkynningu frá ráðuneytinu.

Þá mun Íslandsstofa leggja fjármagn til kynningar á þátttöku Íslands í samvinnu við Kynningarmiðstöð íslenskrar myndlistar.

Sigurður Guðjónsson myndlistamaður verður fulltrúi Íslands á Feneyjartvíæringnum sem var frestað um ári vegna áhrifa Covid-19.

Feneyjartvíæringurinn er alþjóðleg myndlistarsýning helguð samtímalist og einn elsti og virtasti listviðburður heims. Til hans var stofnað árið 1895 en Ísland hefur tekið þátt í tvíæringnum frá árinu 1960.

Kynningarmiðstöð íslenskrar myndlistar, sem hefur umsjón með íslenska skálanum fyrir hönd ráðuneytisins, hefur undirritað samning við skrifstofu Feneyjatvíæringsins um nýtt húsnæði fyrir íslenska skálann á Arsenale, aðalsvæði sýningarinnar. Í kringum sexhundruð þúsund gestir heimsækja að jafnaði það svæði sem þýðir að gestafjöldi í íslenska skálanum geti nær tuttugufaldast frá því sem verið hefur síðastliðin ár.

„Það er gleðilegt að fleiri fái notið framlags Íslands á næsta tvíæringi. Þátttaka í Feneyjartvíæringnum hefur reynst mikilvæg lyftistöng fyrir íslenska myndlistarmenn og ég er þess fullviss að svo verður áfram,“ segir Lilja Alfreðsdóttir mennta- og menningarmálaráðherra.

„Ísland á að baki farsæla sögu á Feneyjatvíæringnum og í gegnum tíðina hafa margir okkar frambærilegustu listamanna verið fulltrúar þar. Nú fáum við tækifæri til að vera staðsett inni í kjarna tvíæringsins og fleiri gestir geta sótt okkur heim. Það er skiptir okkur gríðarlegu máli,“ segir Auður Jörundsdóttir forstöðumaður Kynningarmiðstöðvar íslenskrar myndlistar.