Drógu bíl upp úr Rauðavatni

Bíl var ekið út í Rauðavatn síðdegis í dag og dreginn á land nokkru síðar. Ekki hefur náðst í lögreglu vegna málsins. Sjónarvottur sem Vísir ræddi við kveðst hafa tilkynnt málið til lögreglu, sem komið hafi á staðinn en staldrað stutt við og atvikið því ekki virst alvarlegt.

Mynd af vettvangi sýnir bílinn, sem sjónarvottur segir jeppa af gerðinni Land Cruiser, talsverðan spöl úti í vatninu á sjötta tímanum. Ekki er vitað hvernig eða af hverju bíllinn hafnaði í vatninu.

Að lokum hafi tekist að ná bílnum upp úr vatninu en til þess hafi þurft tvo stóra jeppa. Þeir hafi verið þónokkra stund að athafna sig. Slökkvilið höfuðborgarsvæðisins hafði ekki fengið veður af málinu á níunda tímanum.