„Allt of mikill tími í þinginu sem fer í ekki neitt“

Þorsteinn Víglundsson viðurkennir að vera B týpan sem á í togstreitu við A týpuna kvölds og morgna. Honum leiðist tímasóun og þótt hann sakni þess að vinna með góðu fólki á Alþingi segir hann of mikinn tíma þar fara í þras og ekki neitt. Þorsteinn er í dag forstjóri Eignarhaldsfélagsins Hornsteins, eiganda BM Vallár, Björgunar og Sementsverksmiðjunnar. Hann segir mörg spennandi verkefni í gangi í vinnunni og þar sé ekki síður mikilvægt að halda í jákvæðnina á víðsjárverðum tímum.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefni.

Hvenær vaknar þú á morgnana?

„Vakna yfirleitt sjö en á þó einstaka morgunfundi með kollegunum í Noregi sem gleyma stundum tímamismuninum. Morgunfundir klukkan sex eru ekki málið fyrir B týpu sem er að reyna að virka sem A.“

Hvað er það fyrsta sem þú gerir á morgnana?

„Þrír tvöfaldir expresso. Virka daga sem helgar. Engin betri leið til að keyra kollinn í gang. Er dálítið fyrir að rusla hlutum af svo ég sturta gjarnan niður hálfum lítra af vatni fyrir fyrsta bolla til að friða samviskuna.“

Hverju ertu fegnastur að vera laus við úr pólitíkinni og hverju saknar þú mest?

Ég er fegnastur að vera laus við þrasið og óskilvirknina. Það er allt of mikill tími í þinginu sem fer í ekki neitt. Lýðræðið er auðvitað tímafrekt en það er samt fátt leiðinlegra en tímasóun.

Ég mun hins vegar alltaf sakna góðra félaga úr þingflokknum og þinginu almennt. Þar er úrvalsfólk í öllum flokkum og ekki síður frábært starfsfólk sem vinnur mjög vanþakklátt starf. 

Það er auðvitað heiður að hafa fengið að sitja á þingi og fátt skemmtilegra eða meira gefandi en að fá að vera þátttakandi í mótun framtíðar fyrir land og þjóð.“

Í hvaða verkefni ertu að vinna helst í þessa dagana?

„Dagarnir eru fjölbreyttir þessa dagana. Í rekstrinum er mörg horn að líta enda árið verið fullt af áskorunum. Tryggja öryggi starfsfólks í vinnunni á tímum Covid og takast á við þann samdrátt sem orðið hefur í byggingariðnaði á undanförnum árum.

Á sama tíma er nóg af nýjum og spennandi verkefnum á borðinu sem vonandi eiga eftir að skila góðum árangri. Umhverfismálin eru hvað mikilvægasta verkefnið fyrir utan einstök vaxtartækifæri. Byggingariðnaðurinn á þar mikið verk óunnið og þar getum við ekki gefið neinn afslátt lengur.

Síðan er auðvitað mikilvægast að tapa ekki gleðinni og stuðla að jákvæðum anda í vinnunni á sérstökum tímum.“

Hvernig skipuleggur þú þig í vinnu?

„Ég reyni að skipuleggja vikuna gróflega hvað fundarhöld varðar og er síðan vakandi yfir helstu áherslum og markmiðum hverju sinni. Morgnana nota ég til að taka aðeins púlsinn í fyrirtækinu, fara yfir sölutölur og kanna stöðu helstu mála.

Ég reyni að gæta þess að halda álagi jöfnu og ekki of miklu með því að útdeila verkefnum. Er með frábært samstarfsfólk sem hjálpar svo sannarlega þar.

Þarf stundum að passa mig að gleyma ekki þolinmæðinni heldur. Vil gjarnan sjá hlutina gerast strax og þá reynir á þegar þeir reynast aðeins flóknari í framkvæmd. Mikilvægast er að skilja eftir nægan tíma til að halda yfirsýn og hugsa fram á við.“

Hvenær ferðu að sofa á kvöldin?

„Yfirleitt of seint. Hér takast A og B maðurinn dálítið á. Þykir fátt betra en að slaka aðeins á á kvöldin. Hlusta á góða hljóðbók eða horfa á eitthvað áhugavert. 

A maðurinn er þó farinn að ná yfirhöndinni oftar og er því yfirleitt sofnaður fyrir miðnætti.“