Everton og Burnley skildu jöfn á Turf Moor í dag í fyrsta leik helgarinnar í ensku úrvalsdeildinni.
Gylfi Þór Sigurðsson hóf leik á varamannabekk Everton en Jóhann Berg Guðmundsson var ekki í leikmannahópi Burnley vegna meiðsla.
Leikurinn byrjaði vel fyrir heimamenn því Robbie Brady kom þeim í forystu strax á 3.mínútu leiksins.
Það var svo á þriðju mínútu uppbótartíma fyrri hálfleiks sem Everton jafnaði metin þegar Dominic Calvert-Lewin skoraði eftir góðan undirbúning Richarlison.
Gylfa var skipt inná á 81.mínútu og tíu mínútum síðar fékk hann besta tækifæri Everton til að gera út um leikinn. James Rodriguez gerði þá frábærlega í að finna Gylfa inn á teignum en Nick Pope, markvörður Burnley, sá við Gylfa og tryggði heimamönnum eitt stig. Lokatölur 1-1.
