Sherwood lenti í svipuðum hremmingum eins og McClaren gegn Íslandi: „Þetta gæti bitið mig í rassinn“

Sherwood, sem er fyrrverandi leikmaður og knattspyrnustjóri Tottenham, var sérfræðingur Amazon Prime í leiknum í gær.

Þegar Liverpool fékk hornspyrnu á lokamínútunni kvaðst Sherwood vera þess fullviss að ekkert kæmi úr henni.

„Annað horn. Ég hef ekki of miklar áhyggjur af því. Það gæti bitið mig í rassinn en ég tel að Tottenham hafi yfirhöndina í loftinu. Ég er ekki viss um að nokkur Liverpool-maður verði fyrstur á boltann,“ sagði Sherwood sem var varla búinn að sleppa orðinu þegar Firmino stangaði boltann í netið og tryggði Liverpool sigurinn.

Hinir sérfræðingar Amazon Prime, eins og Robbie Savage, gátu ekki varist hlátri eftir að spádómur Sherwoods gekk alls ekki eftir.

Atvikið minnti um margt á svipað atvik frá leik Íslands og Englands á EM 2016. Steven McClaren talaði þá um hversu litla hættu Íslendingar sköpuðu rétt í þann mund sem Kolbeinn Sigþórsson skoraði sigurmark íslenska liðsins.

Með sigrinum í gær náði Liverpool þriggja stiga forskoti á Tottenham á toppi ensku úrvalsdeildarinnar.

Næsti leikur Liverpool er gegn Crystal Palace í hádeginu á laugardaginn.