Rafmagnslaust í hluta Vesturbæjar

Rafmagnslaust er nú í hluta Vesturbæjar í Reykjavík, að því er fram kemur í tilkynningu frá Veitum. Rafmagnsleysið má rekja til háspennubilunar en unnið er að bilanagreiningu og viðgerð.

Íbúum á svæðinu er bent á að slökkva á þeim rafmagnstækjum sem ekki slökkva á sér sjálf og geta valdið tjóni þegar rafmagn kemur á að nýju.

„Það á sérstaklega við um eldavélar, mínútugrill og fleiri hitunartæki. Eins ráðleggjum við þér að slökkva á viðkvæmum tækjum á borð við sjónvörp. Gættu þess að hafa kæli- og frystiskápa ekki opna lengur en þörf krefur,“ segir í tilkynningu.

Í umræðum um málið í íbúahóp Vesturbæjar á Facebook virðist sem rafmagnslaust sé a.m.k. að hluta til á Högunum og Melunum, og eitthvað norðan Hringbrautar einnig. Þá virðist rafmagnslaust á háskólasvæðinu við Suðurgötu.