Þórarinn Ævarsson vill kaupa Domino‘s

Frá þessu er greint í Markaðnum, fylgiblaði Fréttablaðsins um viðskipti og efnahagsmál, í dag. Samkvæmt heimildum blaðsins eru viðskiptafélagar Þórarins í Spaðanaum þeir Jón Pálmason, annar eigenda IKEA á Íslandi, og Guðni Rafn Eiríksson, fjárfestir og eigandi Skakkaturns, umboðsaðila Apple á Íslandi.

Framtakssjóðurinn Alfa hefur einnig skilað inn tilboði í Domino‘s en áður hafði verið greint frá því fjárfestirinn Birgir Þór Bieltvedt hefði gert kauptilboð í reksturinn. Birgir Örn Birgisson, núverandi framkvæmdastjóri Domino‘s á Íslandi og Skeljungur standa með honum að tilboðinu.

Stjórn Domino‘s í Bretlandi hefur ekki enn tekið ákvörðun um að ganga til einkaviðræðna á grundvelli skuldbindandi tilboðs, með fyrirvara um áreiðanleikakönnun, að því er heimildir Markaðarins herma.

Birgir Bieltvedt hefur tvívegis áður komið að rekstri Domino‘s hér á landi og er í dag meðal eigenda pizzukeðjunnar í Noregi. Hann kom að opnun staðarins á Íslandi árið 1993 en seldi hlut sinn í aðdraganda hrunsins. 2011 keypti hann reksturinn aftur og seldi hann svo 2016 og 2017 með margra milljarða króna hagnaði.

Þá kom Þórarinn Ævarsson einnig að opnun Domino‘s 1993 og hann stýrði fyrirtækinu frá 2000 til 2005. Eftir að hann lét af störfum sem framkvæmdastjóri IKEA opnaði hann pizzastaðinn Spaðann sem er með útibú í Kópavogi og Hafnarfirði.