Stór­sigur hjá Al­freð og þeir þýsku í góðum málum

Þeir þýsku gerðu jafntefli við Svía í fyrsta leiknum og þurftu því lærisveinar Alfreðs Gíslasonar á stigunum tveimur að halda í dag.

Tvö efstu liðin fara áfram upp úr riðlinum á Ólympíuleikana í sumar en þeir þýsku gáfu tóninn í fyrri hálfleik.

Þar skoruðu þeir 22 mörk gegn tólf mörkum Slóveníu og í raun varð eftirleikurinn auðveldur. Lokatölur níu marka sigur þeirra þýsku, 36-27.

Þeir eru því með þrjú stig en Slóvenar eru með tvö stig. Þýskaland mætir Alsír í síðasta leiknum og dugir jafntefli í þeim til að komast á Ólympíuleikana í sumar.

Marcel Schiller var markahæstur hjá Þjóðverjum með sjö mörk. Julius Kuehn gerði sex og Timo Kastening fimm.

Blaz Blagotinsek var markahæstur hjá Slóveníu með fimm mörk.