Minnisblað væntanlegt: Mun meiri áhugi á landinu nú en við gerðum ráð fyrir

Tveir greindust smitaðir af kórónuveirunni í gær og voru báðir í sóttkví. Annað smitið kom upp á Sauðárkróki og eru  nú14 manns í einangrun í Skagafirði .

Samkvæmt flugáætlun Isavía er von á á 18 farþegavélum á Keflavíkurflugvöll um helgina sem er meira en síðustu helgi þegar met var slegið á þessu ári. 

Þá er Ísland nú aftur skilgreint sem grænt á korti á korti Sóttvarnastofnunar Evrópu.

 Þórólfur Guðnason segist ætla að skila heilbrigðisráðherra minnisblaði um aðgerðir á landamærum á næstunni.

„Ég held að áhugi á landinu sé að gerast miklu fyrr en við gerðum ráð fyrir.  Það var ekki gert ráð fyrir þessu fyrr en í júní júlí,“ segir Þórólfur.

Eitt af því sem Þórólfur hefur bent á er að leitað verði til Íslenskrar erfðagreiningar vegna skimunar á landamærum. 

„Það er verið að skoða  útfærslu á þessu. Best er að reyna að taka á móti öllum þessum farþegum án þess að slaka á sóttvarnarkröfum,“ segir hann.

Norska ríkisstjórnin ákvað í gær að hætta skuli alfarið notkun á bóluefni AstraZeneca gegn COVID-19 í Noregi og hefur það verið fjarlægt úr bólusetningaráætlun heilbrigðisyfirvalda. Þórólfur segir að það hafi ekki áhrif á bólusetningaráform hér á landi.

„Þeir eru með ansi marga sem veiktust alvarlega og það litar þeirra ákvörðun. En það eru langflestar þjóðir í Evrópu sem nota enn þá bóluefnið. Við höfum farið mjög varlega nú síðast fengu karlar á fertugsaldri bóluefnið. Við erum að bíða eftir frekari niðurstöðum,“ segir Þórólfur.

Fram hefur komið að þegar Bandaríkin opnast fyrir ferðamönnum frá  Schengen sé ekki sé víst að fólk bólusett með bóluefni AstraZeneca fái að ferðast þangað. 

Aðspurður um hvort fólk sem þarf nauðsynlega að fara til Bandaríkjanna og hefur verið bólusett með AstraZeneca hér á landi gæti fengið annað bóluefni ef þessi ákvörðun stendur þegar opnað verður þar segir Þórólfur.

„Nei, við erum að bólusetja hér með bóluefnum sem eru samþykkt í Evrópu. Það að Bandaríkjamenn samþykki ekki bólusetningarvottorð bóluefna er erfitt fyrir okkur að ráða við.  Við getum ekki breytt út af okkar áætlunum varðandi það.  Það væri vonlaust. Það er nógu erfitt fyrir með þessa mismunandi aldurskiptingu og  mismunandi magn og flokka bóluefna að taka það inn í líka,“.

Þórólfur segir stöðuna nú vekja bjartsýni. 

„Nú er bara að tryggja það að við fáum ekki smit inn frá landamærunum.  Sérstaklega þegar við erum að aflétta aðgerðum hér innanlands,“ segir Þórólfur.