Golfkastarar hafa mesta trú á Johnson og Schauffele á PGA

Sigmundur og Þórður hituðu ítarlega upp fyrir PGA meistaramótinu í síðasta þætti Golfcastsins og ræddu meðal annars um líklega sigurvegara.

„Ég ætla að taka augljósasta kostinn og velja Dustin Johnson,“ sagði Sigmundur.

„Þetta er slungið en ég ætla aftur að taka Xander Schauffele eins og á Masters. Hann byrjaði þá ekkert sérstaklega vel en kom ágætlega til baka.“

Sigmundur hefur einnig ágætis trú á Rory McIlroy þótt hann sé ekki sammála mati veðbanka að hann sé sigurstranglegastur á PGA meistaramótinu. McIlroy hefur ekki unnið risamót síðan 2014.

Þórður kveðst einnig vongóður fyrir hönd Spánverjans Jons Rahm sem á enn eftir að vinna risamót á ferlinum.

„Hann er alltaf flottur og sýndi það bara á Masters. Þótt hann hafi verið nýbúinn að eignast barn spilaði hann ógeðslega vel síðasta daginn og var með lægsta hringinn. Hann getur alltaf kveikt á sér á stórmótum og spilar eiginlega alltaf vel,“ sagði Þórður.

Þeir Sigmundur nefndu einnig kylfinga sem gætu komið á óvart á PGA meistaramótinu.

„Ég held að ég fari í Lanto Griffin,“ sagði Sigmundur en Þórður nefndi Joel Dahmen.

„Það væri geggjað ef hann gerði einhverjar rósir. Hann slær reyndar ekkert sérstaklega langt og þessi völlur hentar honum örugglega ekki vel. En það verður gaman að sjá hvernig að hann kemur út úr því,“ sagði Þórður.

Að þessu sinni fer PGA meistaramótið fram á Kiawah Island vellinum sem er lengsti völlur sem leikið hefur verið á risamóti.

Bein útsending frá fyrsta degi PGA meistaramótsins hefst klukkan 17:00 á Stöð 2 Golf.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.