Þetta kemur fram í skriflegu svari frá Þórhildi Ósk Hagalín, upplýsingafulltrúa Útlendingastofnunar, við fyrirspurn fréttastofu. Hún segir þar að allir einstaklingar í þessari stöðu séu upplýstir um það að með því að koma í veg fyrir framkvæmd ákvörðunar stjórnvalda á þennan hátt geti komið til þess að þjónusta verið felld niður. Þeir séu jafnframt upplýstir um það að snúist þeim hugur og ákveði þeir að fara í prófið geti þeir fengið þjónustu að nýju þangað til að flutningi kemur.
„Þeir hafa síðan fengið tíma til að hugsa sig um og ráðfæra sig við þá sem þeir vilja áður en þjónustan hefur verið felld niður,“ segir í svarinu.
Nokkrir þeirra sem upphaflega neituðu að fara í Covid próf féllust á það þegar þeim var gerð grein fyrir því hvaða afleiðingar það gæti haft.
Hræðist afdrif fjölskyldu sinnar á Gaza
Ahmed Irheem, Palestínumaður sem hefur verið synjað um hæli hér á landi, er einn þeirra sem neitað hefur að gangast undir Covid-próf. Hann ræddi stöðu sína í kvöldfréttum Stöðvar 2 á þriðjudag. Þar sagið hann meðal annars frá því að fjölskylda hans, eiginkona og þrjú börn, séu enn á Gaza. Hann hafi miklar áhyggjur af þeim vegna stöðunnar þar.
Þá sagði Arndís Anna K. Gunnarsdóttir, lögmaður Ahmeds, að honum og öðrum í sömu stöðu sé gert að velja milli götunnar hér á landi eða í Grikklandi, þangað sem til stendur að senda þá.
„Það var algjörlega óboðlegt áður en heimsfaraldur Covid skall á. Og þú getur rétt ímyndað þér að það hefur ekki skánað með heimsfaraldri. Allar aðstæður eru miklu erfiðari en þær voru og það tekur náttúrulega langan tíma að byggja það upp aftur,“ sagði Arndís á þriðjudag.
Telja að réttur til þjónustu hafi fallið niður daginn sem mennirnir neituðu að gangast undir próf
Í svari Útlendingastofnunar segir að enn sé óljóst hvernig svona mál muni leysast neiti fólkið að gangast undir Covid-próf. Það muni þó ekki breyta endanlegri niðurstöðu stjórnvalda um að viðkomandi aðilum beri að yfirgefa landið.
Andrés Ingi Jónsson, þingmaður Pírata, gangrýndi málið harðlega á Alþingi í gær og sagði hann meðal annars að verið væri að svelta hælisleitendur til hlýðni. Útlendingastofnun hafnar því.
„Verndarkerfið er neyðarkerfi fyrir fólk á flótta. Á meðan einstaklingar bíða eftir svari yfirvalda við umsókn um vernd eiga þeir rétt á þjónustu frá stofnuninni en í lögum og reglugerð um útlendinga er kveðið á um upphafi og endi þessarar þjónustu,“ segir í svarinu.
Þá hafa lögmenn mannanna fullyrt að þessar aðgerðir séu ólögmætar og hafa vísað í ákvæði 23 í reglugerð um útlendinga. Útlendingastofnun segir að samkvæmt 3. málsgrein þeirrar reglugerðar falli þjónusta við umsækjendur um vernd niður á þeim degi þegar ákvörðun um að umsækjandi um alþjóðlega vernd skuli yfirgefa landið kemur til framkvæmdar.
„Ákvörðunin í máli umrædda einstaklinga kom til framkvæmdar á þeim degi sem til stóð að stoðdeild ríkislögreglustjóra fylgdi þeim til Grikklands eins og þeim hafði verið tilkynnt. Það er mat stofnunarinnar að samkvæmt ákvæðinu hafi rétturinn til þjónustu fallið niður við það að einstaklingarnir skyldu koma sér hjá framkvæmdinni á umræddum degi með því að neita að fara í Covid-próf.“
