Ólafur Kram sigraði í Músíktilraunum

Hallgerður Kolbrún E. Jónsdóttir skrifar 30. maí 2021 14:08

Hljómsveitin Ólafur Kram bar sigur úr bítum í Músíktilraunum 2021. Músíktilraunir

Hljómsveitin Ólafur Kram bar sigur úr bítum í Músíktilraunum, sem fór fram í Hörpu í gær. Tólf hljómsveitir tóku þátt í keppninni og eftir æsispennandi úrslitakvöld var niðurstaða dómnefndar og símakosninga kynnt.

Hér standa meðlimir hljómsveitarinnar Eilíf sjálfsfróun á sviði við verðlaunaafhendingu.Músíktilraunir

Meðal verðlauna voru hljóðverstímar, spilamennska á ýmsum tónlistarhátíðum hérlendis og úttektir í hljóðfæra- og tónlistarverslunum.

Eins og áður segir hafnaði hljómsveitin Ólafur Kram í fyrsta sæti, auk þess sem sveitin fékk viðurkenningu fyrir textagerð á íslensku, Eilíf sjálfsfróun í öðru og Grafnár í því þriðja. Piparkorn var valin hljómsveit fólksins þetta árið.

Söngvari Músíktilrauna er Halldór Ívar Stefánsson, söngvari Eilífar sjálfsfróunar, og gítarleikari Músíktilrauna Ívar Andri Bjarnason, gítarleikari í Sleem.

Grafnár hampaði þriðja sæti í Músíktilraunum.Músíktilraunir

Guðmundur Hermann Lárusson í Krownest var valinn bassaleikari Músíktilraun og Magnús Þór Sveinsson í Piparkorni var valinn hljómborðsleikari keppninnar. Alexandra Rós Norðkvist, í hljómsveitunum Salamöndru, The Parasols og Æsu, var valin trommuleikari Músíktilrauna og rafheili Músíktilrauna er Júlíus Óli Jakobsen í Dopamine Machine.