Sjóður í Abú Dabí með 1,8 milljarða eignarhlut í Íslandsbanka

Þetta kemur fram í nýrri frétt Viðskiptablaðsins en blaðið hefur komist yfir nýjan hluthafalista. Markaðsvirði hlutarins nemur hátt í 400 milljónum króna.

Samkvæmt téðum lista á hlutafélagið Al Mehwar Commercial Investments LLC 18 milljónir hluti eða 0,9% af hlutafé Íslandsbanka. „Markaðsvirði hlutarins er rúmlega 1,8 milljarðar króna miðað við núverandi hlutabréfagengi Íslandsbanka. Félagið var ekki á lista yfir stærstu hluthafa Íslandsbanka að loknu útboðinu sem birtur var á miðvikudaginn og því má gera ráð fyrir að sjóðurinn hafi keypt bréfin að mestu eða öllu leyti eftir útboðið.“

Keyptu og seldu viku síðar með miklum hagnaði

Viðskiptablaðið greindi frá því í gær að stórir erlendir fjárfestingasjóði hafi sumir hverjir þegar selt flesta eða alla þá hluti sem þeir keyptu í Íslandsbanka fyrir viku með ríflegri ávöxtun. Þórður Snær Júlíusson ritstjóri Kjarnans hefur ritað grein um þennan einn stærsta fjármálagjörning Íslandssögunnar og segir þar um ævintýralega tilfærslu fjármuna á eignum almennings til þeirra sem betur mega sín. Fyrir liggur sem óyggjandi staðreynd að hlutabréf í bankanum voru seldir af hálfu ríkisins á undirverði sem um munaði. Að sögn Þórðar Snæs er 35 prósent hlutur í Íslandsbanka, sem er að uppistöðu nánast eins og Arion banki nema aðeins stærri, var seldur á verði sem er 34 prósent undir markaðsvirði Arion banka. Engar vitrænar skýringar hafa verið gefnar á þessu:

„Sá sem keypti fyrir milljón krónur gat selt þann hlut með 250 þúsund króna hagnaði viku síðar. Miðað við fjölda viðskipta fyrstu tvo daganna eftir skráningu Íslandsbanka á markað þá seldu margir úr þessum hópi strax. Þeir keyptu eign af ríkinu, héldu á henni í viku, og tóku svo út 20-25 prósent ávöxtun,“ skrifar Þórður Snær og segir að fyrir þessa uppstillingu hafi ríkissjóður og ríkisbankinn greitt nokkrum erlendum fjárfestingabönkum, íslenskum bönkum og fjármálasjoppum rúma tvo milljarða króna í þóknanir.

Fjárfestingar furstadæmisins

Að sögn Viðskiptablaðsins virðist sem Al Mehwar falli undir eitt ríkisfjárfestingafélaga furstadæmisins Abú Dabí, Abu Dhabi Investment Council (ADIC) en stjórnarformaður Al Mehwar, Mohammed Ali Al Shaheri, er einn æðsti stjórnandi ADIC og skrifstofur félaganna eru skráðar í sömu byggingu.

ADIC var stofnað árið 2007 af ADIA, þriðja stærsta þjóðarsjóði heims, til að fjárfesta „umfram fjármagni“ furstadæmisins í alþjóðlega dreift eignasafn, samkvæmt heimasíðu fjárfestingarfélagsins. „Ein stærsta eign félagsins er First Abu Dhabi Bank, stærsti banki Sameinuðu arabísku furstadæmanna (UAE) en auk þess á það í þremur öðrum bönkum þar í landi. Ein frægasta fjárfesting ADIC kom árið þegar sjóðurinn keypti 90% í Chrysler byggingunni í New York á 800 milljónir dala. Sjóðurinn seldi svo bygginguna árið 2019 fyrir einungis 150 milljónir dala,“ segir í Viðskiptablaðinu.

Aðrir erlendir fjárfestar sem komu ekki fram á listanum yfir tuttugu stærstu hluthafa Íslandsbanka í kjölfar útboðsins er SEI Institutional með 0,34% hlut. Einnig er Arbiter Partners með 0,13% hlut. Að sögn blaðamanna Viðskiptablaðsins liggur ekki fyrir hvort umræddir fjárfestar fengu úthlutað hlutunum í hlutafjárútboðinu eða hvort þeir hafi átt viðskipti í kjölfarið.

Bogi Þór, Linda Björk og Reynir Grétarsson umfangsmikil

„Þá virðast hjónin Bogi Þór Siguroddsson og Linda Björk Ólafsdóttir vera orðin stærstu einkafjárfestarnir í bankanum með 0,2% hlut í gegnum félögin Bóksal ehf. og AKSO ehf, sem heldur utan um rekstur Fagkaupa. Markaðsvirði hlutarins nemur hátt í 400 milljónir króna,“ segir ennfremur í frétt Viðskiptablaðsins.

Annað nafn sem blaðamenn Viðskiptablaðsins ráku augu í er Reynir Grétarsson sem er stofnandi Creditinfo. Hann „á um 0,05% hlut í Íslandsbanka, jafnvirði tæplega hundrað milljónum króna, í gegnum félagið InfoCapital ehf. Reynir keypti fyrr í ár 0,5% hlut í Arion Banka fyrir um milljarð króna í apríl síðastliðnum.“

Eins og Vísir hefur greint frá hafa ýmsir gagnrýnt sölu á bankanum harðlega svo sem Björn Leví Gunnarsson þingmaður Pírata og Gunnar Smári Egilsson leiðtogi Sósíalistaflokks Íslands.