Stjarnan er úr leik í Sambandsdeild Evrópu eftir 3-0 tap gegn írska liðinu Bohemians ytra í kvöld. Fyrri leikurinn endaði 1-1 í Garðabænum og Bohemians unnu því samanlangt 4-1.
Fyrsta mark leiksins kom eftir rúmlega hálftíma leik. Þar var á ferðinni Georgie Kelly eftir stoðsendingu frá Dawson Devoy.
Staðan var því 1-0 þegar flautað var til hálfleiks, en á 54.mínútu bætti Kelly öðru marki sínu við eftir stoðsendingu frá Liam Burt og brekkan því orðin ansi brött fyrir Stjörnumenn.
Liam Burt innsyglaði svo sjálfur sigurinn stundarfjórðungi fyrir leikslok. Lokatölur 3-0 og Bohemians mætir F91 Dudelange frá Lúxemborg í annari umferð forkeppninnar.
Stjarnan tók á móti írska liðinu Bohemians í fyrri leik liðanna í forkeppni Sambandsdeildar Evrópu. Liðin skildu jöfn 1-1 en gestirnir frá Dublin voru meira með boltann en ógnuðu lítið á meðan heimamenn náðu ekki að búa sér til mörg færi en náðu að nýta sér eitt þeirra fáu sem sköpuðust.
