Fyrrum NBA-stjarna sest aftur á skóla­bekk og stefnir á að spila golf

Það eru komin 17 ár síðan J. R. Smith hætti í námi til að spila í NBA-deildinni í körfubolta. Þar lék hann frá 2004 til 2020 með stuttu stoppi í Kína. 

Eftir að hafa orðið meistari með Los Angeles Lakers á síðasta ári ákvað hann að leggja skóna á hilluna og hefur nú skráð sig til náms í A&T State-háskólanum í Norður-Karólínu. Smith er ekki alveg hættur öllum boltaleik en hann ætlar sér að spila golf meðan hann stundar nám.

„Golf er leikur sem getur farið með þig í hæstu hæðir eða knésett þig og gert lítið úr þér. Að vita að maður ber alla ábyrgðina sjálfur, maður þarf ekki að hafa áhyggjur af liðsfélögum né spila vörn. Ég get spilað minn eigin leik og haft gaman,“ sagði J. R. Smith um hina nýju ástríðu sína í viðtali við vef PGA-mótaraðarinnar.

„Mér var alltaf sagt að ég gæti farið aftur í skóla hvenær sem er ef NBA draumurinn myndi ekki ganga upp. Svo þetta er „hvenær sem er“ augnablikið mitt.“

Smith, sem er með fimm í forgjöf, stefnir á að spila með golfliði skólans um leið og NCAA gefur leyfi. Hann er einnig spenntur fyrir náminu.

„Ég hef engan frítíma núna. Að ala upp börn og setjast á skólabekk, dagskráin hjá mér verður pökkuð og ég get ekki beðið,“ sagði fyrrum NBA-meistarinn J. R. Smith um þessa nýju áskorun í lífi sínu.