Mæta Austurríki eða Eistlandi í HM umspilinu

Dregið var í umspilið í Búdapest í dag en níu Evrópuþjóðir munu bætast við þær fimm þjóðir sem þegar hafa tryggt sér sæti á HM í handbolta 2023.

Norðmenn tryggðu sér farseðil á HM með dramatískum sigri á Íslandi í framlengdum leik um 5.sæti á EM í gær og því var Ísland í pottinum í dag.

Íslendingar geta þokkalega vel við unað en möguleiki var á að mæta sterkum liðum á borð við Slóveníu eða Portúgal.

Leika á heima og að heiman og fara leikirnir fram um miðjan aprílmánuð. Þó er óvíst hvort  íslenska landsliðinu verði fundinn leikhæfur keppnisstaður hér á landi.