Englandsmeistararnir fyrstir til að tryggja sér sæti í átta liða úrslitum

Peterborough situr í neðsta sæti B-deildarinnar og því nokkuð ljóst að um erfiðan leik væri að ræða gegn ríkjandi Englandsmeisturum sem tróna á toppi ensku úrvalsdeildarinnar.

Þrátt fyrir þennan mikla mun á liðunum var enn markalaust þegar flautað var til hálfleiks, en Riyad Mahrez kom City yfir eftir rétt tæplega klukkutíma leik.

Það var svo dýrasti leikmaður enskrar knattspyrnu frá upphafi, Jack Grealish, sem tvöfaldaði forystu gestanna með marki á 67. mínútu, og þar við sat.

Niðurstaðan varð 2-0 sigur Manchester City og liðið er því á leið í átta liða úrslit.