Real Madrid og Man City áfram í 8-liða úrslit Meistaradeildarinnar

Kylian Mbappe gerði fyrsta mark leiksins á 39. mínútu og allt stefndi í að PSG myndi fara örugglega áfram í næstu umferð keppninnar með eins mark sigur á bakinu eftir fyrri leikinn í París. Eftir rúman klukkutíma leik breyttist allt þegar Karim Benzema mætti til leiks. Benzema jafnaði þá leikinn í 1-1 eftir undirbúning Vinicius Junior og andrúmsloftið á Bernabeu breyttist Madrídingum í hag.

Real sótti án afláts eftir fyrsta mark Benzema og frakkinn knái gerði annað mark Real Madrid á 76. mínútu og viðureignin jöfn, 2-2. Gestirnir frá París voru þar með slegnir út af laginu þar sem að strax í kjölfarið, upp úr miðju PSG, pressuðu heimamenn og unnu boltann, brunuðu upp völlinn og skoruðu þriðja markið. Var þar að verki enginn annar en Karim Benzema sem fullkomnaði þrennuna sína eftir hræðilegan varnarleik PSG. Meira var ekki skorað og Messi, Mbappe og Neymar eru úr leik í Meistaradeildinni í ár.

Manchester City þurfti ekki að hafa fyrir hlutunum í seinni viðureign sinni gegn Sporting sem endaði með markalausu jafntefli á Etihad vellinum. Eftir 0-5 sigur City í Portúgal gátu þeir leyft sér að hvíla nokkra lykilleikmenn liðsins og það merkilegasta sem gerðist í leik þessara liða var að hinn 36 ára gamli þriðji markvörður City, Scott Carson, kom inn á leikvöllinn á 73. mínútu leiksins.