Rangnick útskýrði af hverju hann notaði ekki Lingard

Lingard sat allan tímann á varamannabekknum þegar United vann Brentford, 3-0, á Old Trafford á mánudaginn. Þetta var síðasti heimaleikur United á tímabilinu og Lingard hefði þar getað fengið tækifæri til að kveðja stuðningsmenn liðsins. Samningur hans við United rennur út eftir tímabilið og allt bendir til þess að hann sé á förum frá félaginu.

Bróðir Lingards var langt frá því að vera sáttur við ákvörðun Rangnicks og deildi reiði sinni með heimsbyggðinni á Instagram.

„Tuttugu ár af blóði, svita og tárum, fjórir titlar, þrjú mörk í úrslitaleikjum en fær ekki einu sinni kveðjustund. Engin furða að Sambandsdeildin bíði á næsta ári,“ skrifaði Scott meðal annars.

Á blaðamannafundi í dag útskýrði Rangnick af hverju hann notaði Lingard ekki í leiknum gegn Brentford.

„Síðustu vikurnar undir minni stjórn hefur hann spilað mun meira en hann gerði áður. Í öðru lagi bað hann um að spila ekki gegn Chelsea og sleppa æfingu daginn eftir vegna persónulegra ástæðna,“ sagði Rangnick. 

„Þetta var ástæðan. Með þrjár skiptingar þurfti ég að velja á milli Edinsons Cavani, Lingards og hins unga Alejandro Garnacho sem ég hefði viljað setja inn á. Ég ákvað að nota Cavani. Ef ég hefði ekki gert það hefði einhver sagt að það hafi verið taktlaust. Þú verður að taka ákvörðun, það verða ekki allir sáttir með hana og þannig er boltinn.“

United sækir Brighton heim í næstsíðasta leik sínum á tímabilinu klukkan 16:30 á morgun.