Fengu áður óbirtan ljóðabálk eftir Davíð Stefánsson

Fréttablaðið greinir frá þessu. Ljóðabálkurinn ber heitið „Lítil saga“ og var skrifaður áður en fyrsta ljóðabók Davíðs, Svartar fjaðrir, kom út. Ljóðin voru tileinkuð Helgu Gunnlaugsdóttur frá Ytri-Reistará, sem var góð vinkona Davíðs í æsku.

Ljóðin voru varðveitt af Stefáni Lárusi Árnasyni, syni Helgu, í gegnum árin. Dætur Stefáns færðu Davíðshúsi þau síðan á dögunum.

„Það er byrjendabragur á kvæðinu, en angurværðin er í anda Davíðs, segir mér fróðara fólk,“ segir Haraldur Þór Egilsson, safnstjóri Minjasafnsins á Akureyri í samtali við Fréttablaðið. Haraldur bar ljóðin undir sérfræðinga í höfundarferli Davíðs og telja þeir að Davíð hafi skrifað ljóðin.