Streymisveitan HBO Max, sem hafði boðað komu sína hingað til lands á seinnihluta þessa árs, verður ekki á boðstólum íslenskra sjónvarpsunnenda fyrr en seint á árinu 2024.
Þetta staðfesti fyrirtækið í svari við fyrirspurn Fréttablaðsins. Ástæðan er sögð vera kaup Discovery á Warner Media, sem hafi breytt áherslum og þá sérstaklega með tilliti til streymisveitunnar.
Sameinað fyrirtæki, Warner Bros. Discovery, hyggst þannig á næstu misserum einbeita sér að útgáfu nýrrar og öflugri streymisveitu sem sameinar HBO Max og Discovery plús.
Sú streymisveita er væntanleg hingað 2024, ef allt gengur eftir.
Ákvörðun forsvarsmanna Warner Bros og HBO um að hætta við útgáfu kvikmyndarinnar um Leðurblökustúlkuna (Batgirl) hefur vakið mikla athygli á undanförnum dögum og jafnvel furðu. Framleiðsluferli myndarinnar var mjög langt komið og er sagt hafa kostað allt að níutíu milljónir dala, sem samsvarar um 12,4 milljörðum króna.
