Mikil vonbrigði hjá bæði Jóhanni Berg og Jóni Daða

Jóhann Berg hefur verið meiddur síðan í febrúar en var í fyrsta skipti í leikmannahópi Burnley síðan þá í dag. Hann kom þó ekki við sögu er Blackpool kom í heimsókn á Turf Moor.

Josh Brownhill kom Burnley þar yfir á 3. mínútu og Nathan Tella tvöfaldaði forskotið átta mínútum síðar. Theodor Corbeanu minnkaði muninn fyrir Blackpool á 21. mínútu en Tella skoraði öðru sinni á 33. mínútu og staðan 3-1 fyrir Burnley í hálfleik.

Þannig stóð fram á 74. mínútu þegar Shayne Lavery minnkaði muninn í 3-2 og aðeins þremur mínútum síðar jafnaði Jerry Yates leikinn fyrir Blackpool.

Von Burnley varð bjartari þegar Sonny Carey úr liði Blackpool fékk beint rautt spjald á 83. mínútu en Burnley voru aðeins manni færri í tvær mínútur því Hollendingurinn ungi Ian Maatsen fékk einnig beint rautt spjald á 85. mínútu.

3-3 fór leikurinn og missti Burnley því niður tveggja marka forystu. Eftir sigur í fyrstu umferð hefur liðið mistekist að vinna síðustu fjóra og er með sex stig í 15. sæti eftir fimm leiki. Blackpool er með sjö stig í ellefta sæti.

Jón Daði kom af bekknum í tapi

Jón Daði Böðvarsson kom inn á sem varamaður á 62. mínútu hjá Bolton sem tapaði 2-0 fyrir Sheffield Wednesday í ensku C-deildinni. George Byers og Liam Palmer skoruðu mörk Wednesday í fyrri hálfleik.

Tapið er dýrt í jafnri deildinni en Sheffield fór upp fyrir Bolton, í fjórða sæti með tíu stig, en Bolton er í því sjöunda með átta stig.