Eigandinn hafi mætt með leyfi MAST til að flytja hryssuna og folaldið: „Fólk er við það að taka völdin í sínar hendur“

Fréttastofa fjallaði fyrst um málið fyrr í vikunni þar sem íbúar sögðust lamaðir vegna slæmrar meðferðar á hestum á bænum. Steinunn Árnadóttir, íbúi í Borgarnesi, hafði ítrekað kvartað til lögreglu og Matvælastofnunar vegna málsins.

Einhver hross voru flutt út á beit í gær að beiðni MAST en að sögn Steinunnar var illa haldin hryssa enn innilokuð ásamt folaldi.

„Þessi folaldsmeri er búin að vera lokuð inni í lítilli stíu og hún er búin að vera inni síðan í byrjun maí. Þessi stía nýtur ekki dagsbirtu, það er bara myrkur þarna inni, og þarna á þetta vesalings folald bara að veslast upp,“ segir Steinunn.

Fjallað var ítarlega um stöðu mála í kvöldfréttum Stöðvar 2 í gær en hægt er að horfa á innslagið í spilaranum hér fyrir neðan.

Búin að gefast upp á því að kvarta til yfirvalda

Nú skömmu fyrir hádegi hafði Steinunn síðan samband við lögregluna á Vesturlandi þar sem hún sá eigandann fyrir utan hesthúsið þar sem hryssan var. Sjálf taldi hún að til stæði að vörslusvipta eigendurna um hrossin, líkt og dýralæknir MAST hafði sagt að þyrfti að gera.

Samkvæmt upplýsingum sem hún fékk frá lögreglu var eigandinn aftur á móti á staðnum, með leyfi MAST, til að flytja hryssuna og folaldið. Þannig virðist eigandinn fá að halda hestunum þrátt fyrir mikla gagnrýni.

Lögreglan á Vesturlandi gat ekki veitt upplýsingar um málið í dag og vísaði til Matvælastofnunar, sem neitaði að tjá sig um málið þegar fréttastofa leitaði svara.

„Það er allt á suðupunkti, fólk er við það að taka völdin í sínar hendur,“ segir hún og bætir við að þau séu gjörsamlega vanmáttug.

„Það er svo skrýtið að við tilkynningar að það sé ekki brugðist við. Við erum algjörlega búin að gefast upp á því, við hringjum eða sendum ábendingu eða reynum að gera eitthvað til að lagfæra aðstöðu og því er ekki sinnt,“ segir hún enn fremur.

Matvælaráðuneytið með málið til skoðunar

Engin svör hafa enn sem komið er borist frá Matvælastofnun en Steinunn lét þau fyrst vita af ástandinu í júní. Frá þeim tíma hefur hún ítrekað reynt að fá svör án árangurs. Þá sendi hún Svandísi Svavarsdóttur matvælaráðherra bréf á dögunum og fékk einhver svör frá ráðuneytinu í dag.

„Það á að vera einhver samráðsfundur núna um miðjan september og þá á að taka þessi mál til skoðunar. Ríkisendurskoðun er búin að gefa út yfirlýsingu að eftirlitskerfið og vinnulag MAST verði tekin til skoðunar sem er mjög gott. Það var áfangasigur að heyra það,“ segir hún.

Steinunn segir nauðsynlegt að ráðist sé í heildarendurskoðun á kerfinu en Dýraverndarsamband Íslands hefur meðal annarra sagt MAST endurtekið bregðast seint og illa við þegar upp kemur grunur um slæma meðferð.

„Það þarf náttúrulega að taka þetta kerfi algjörlega til endurskoðunar, algjörlega að stokka þessu upp,“ segir Steinunn.