Ármann og Dusty mættust í Inferno sem var viss áhætta fyrir Ármann enda Dusty ansi góðir í því. Hnífalotan féll með Ármanni sem byrjaði í vörn.
Fyrsta lotan var glæsileg þar sem Vargur hafði betur gegn StebbaC0C0 og tryggði Ármanni sitt fyrsta stig í leiknum. En þau áttu þó ekki eftir að verða mörg í viðbót. Dusty hélt spilunum þétt að sér og vann næstu þrjár lotur á snyrtilegan hátt.
Ármann minnkaði muninn í 3–2 en þá tók við 10 lotu runa frá Dusty. StebbiC0C0 var með flestar fellur í upphafi leiks en hæg og rólega sigldi Bóndi fram úr honum og slátraði fyrrum liðsfélögum sínum úr Ármanni. Þannig unnust loturnar á fellum en ekki á því að setja sprengjuna niður. Dusty ofmetnaðist aldrei heldur lék öruggt og yfirvegað.
Staða í hálfleik: Ármann 2 – 13 Dusty
Ármann náði aðeins einu stigi í síðari hálfleik og StebbiC0C0 átti því ekki erfitt með að sigla sigrinum heim fyrir sitt lið eftir einungis 19 lotur.
Lokastaða: Ármann 3 – 16 Dusty
Liðin á toppnum eru því farin að skiljast að, Dusty heldur toppsætinu í deildinni en Ármann er engu að síður í góðri stöðu þrátt fyrir stórtap.
Næstu leikir liðanna:
- Dusty – TEN5ION, þriðjudaginn 4/10, klukkan 19:30
- Fylkir – Ármann, þriðjudaginn 4/10, klukkan 20:30
Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.
