Mamma Elvars rakst á konu á Facebook sem hún kannaðist við

Hann var alinn upp af yndislegum foreldrum í hópi þriggja systkina á Íslandi. Áhugi hans á upprunaleit kviknaði ekki fyrr en fyrir örfáum árum, en eftir það ákvað móðir hans, Margrét Þráinsdóttir, að gera allt sem í hennar valdi stæði til að hjálpa honum að leita.

Kærasta og barnsmóðir Elvars er fædd í Taílandi en fluttist til Íslands á unglingsárunum og hefur búið hér síðan. Synir þeirra eru því íslenskir og taílenskir, eiga ættingja í Taílandi sem þeir heimsækja reglulega og föðurfjölskyldu hér heima - og svo eru það líffræðilegu ættingjarnir í Gvatemala sem Elvar vissi lítið sem ekkert um.

Fengu fréttirnar þegar hann var aðeins vikugamall

Margrét Þráinsdóttir, mamma Elvars, hellti sér út í upprunaleit með syninum. Hún og eiginmaður hennar, Torfi Karl Karlsson, ættleiddu eldri son sinn, Davíð Örn, frá Gvatemala árið 1979. Hann var aðeins vikugamall þegar þau fengu fregnir af honum og hálfum mánuði seinna voru þau komin út að sækja hann.

Elvar fæddist með skarð í vör. Hann fór í aðgerðir vegna þess hér heima sem gengu vel og sem fyrr segir átti hann góð og hamingjurík æskuár á Íslandi.

Ef þú hefur ekki nú þegar séð þáttinn ættir þú ekki að lesa meira.

.

.

.

.

Það er búið að vara þig við.

.

.

.

.

.

Pappírar Elvars reyndust vera á spænsku og við fyrstu sýn virtust þeir líka innihalda fátt annað en staðlaðar upplýsingar um ættleiðingar. Margrét fékk spænskumælandi einstakling til liðs við sig og fékk þann grun sinn staðfestan, en í pappírunum var þó bæði nafn móðurinnar og fæðingardagur svo Margrét lagði af stað með fátt annað í höndunum, nafnið Dominga Mateo og fæðingardagurinn 28. september 1963.

Í ljós kom að listinn á Facebook var langur yfir konur sem hétu þessum nöfnum. Engin þeirra reyndist þó vera skráð með þennan fæðingardag og Margrét eyddi löngum stundum í að fletta í gegnum myndaalbúm og velta því fyrir sér hvort viðkomandi kona gæti verið sú sem var á myndinni sem fylgdi með syni hennar fyrir 40 árum.

En eftir ófáar stundir framan við tölvuna sá hún andlit á konu sem henni fannst að gæti verið kunnuglegt. Eftir dágóða stund ákvað Margrét að senda konunni skilaboð og eftir langan tíma og aðstoð frá vinum hennar á Facebook kom loksins svar.  Hún var konan á myndinni og móðir Elvars fundin.

Bróðir Elvars myrtur

Það var því ákveðið að skella sér út til Gvatemala og fór kærasta Elvars með honum út. Elvar hafði áður fengið að vita að hann hefði verið frumburður móður sinnar og að hann ætti fjögur yngri systkini í Gvatemala sem hefðu vitað af honum alla tíð. Þrjár systur og bróður sem lést árið 2013 en sá var myrtur þegar hann var staddur á bensínstöð.

Fjölskylda Elvar býr við mikla fátækt úti og voru aðstæður þeirra slæmar en það kom ekki að sök þegar Elvar fékk að hitta móður sína í fyrsta sinn í fjörutíu ár. Einstaklega fallegt augnablik eins og sjá má hér að neðan.