Reyndu allt til að halda veginum opnum við for­dæma­lausar að­stæður

Reykjanesbrautin var lokuð í rúman sólarhring frá aðfaranótt mánudags til hádegis á þriðjudag en á veginum var hávaðarok, blint og mikill skafrenningur. Lokunin hafði þau áhrif að flugferðum var aflýst og hafði röskunin áhrif á um 24 þúsund farþega, samkvæmt upplýsingum frá Icelandair. 

Bergþóra Þorkelsdóttir vegamálastjóri segir allt hafa verið reynt til að halda brautinni opinni en um hafi verið að ræða fordæmalausar aðstæður þar sem það snjóar yfirleitt ekki mjög mikið á Reykjanesinu, hvað þá á svona stuttum tíma.

„Við erum annars vegar mjög áköf um það að sinna þessu af alúð og halda þessari braut opinni. Á hinn bóginn þá erum við líka háð þeim veðuraðstæðum sem við erum að takast á við á ákveðnum tíma og þessar aðstæður voru fordæmalausar miðað við þá reynslu sem við höfum,“ segir Bergþóra.

Ekki hafi skort viðbrögð af þeirra hálfu en þau fréttu af því síðdegis á sunnudag að veðurspáin færi versnandi. Fjórir stórir bílar og átta moksturstæki hafi verið á sólarhringsvakt allt frá föstudeginum. Tilraunir til að opna veginn aftur eftir að honum var lokað á aðfaranótt mánudags gengu illa.

„Það liggur alveg fyrir að það er gríðarleg ákefð af okkar hendi að halda þeim vegi opnum og við reyndum það þarna á mánudeginum. Það endaði svo með því að við opnuðum ekki fyrr en klukkan níu og menn gáfust upp klukkutíma síðar því að bílarnir voru farnir að fara út af og festa sig,“ segir Bergþóra.

Þá var einnig reynt að fara af stað með fylgdarakstur í nokkra klukkutíma en hætt var við það eftir að ein rúta fór út af veginum. 

Erfitt að komast hjá því að loka veginum 

Vandamálin voru helst á hringtorgum og miðlægum gatnamótum frá Fitjum að Reykjanesbæ, auk þess sem fjölmargir bílar sátu fastir sem Vegagerðin hefur takmarkaðar heimildir til að fjarlægja. Núverandi tæki Vegagerðarinnar hafi ekki ráðið við stöðuna.

„Eitt af því sem við eðlilega munum skoða er hvort okkar grunnviðbragð, það er bara tækjabúnaðurinn okkar, sé nægur. Hann hefur verið nægur kannski síðustu tíu árin en nú fáum við tilfelli þar sem við hefðum viljað vera betur búin,“ segir Bergþóra.

Hún telur ólíklegt að hægt hafi verið að koma í veg fyrir lokunina og vísar til að mynda til Grindavíkurvegarins þar sem það snjóuðu inni tugir ef ekki hundruð bíla á örskömmum tíma eftir umferðaróhapp.

„Á svona umferðarmiklum vegi þar stoppa bílar mjög fljótt og það myndast kaos, þannig ég held að það hefði verið erfitt að komast hjá því, ég segi það bara alveg eins og er. En auðvitað snýst rýnin okkar um það, hefðum við geta opnað fyrr,“ segir hún.

Skoða hvað hefði verið hægt að gera

Allt hafi vissulega verið reynt en þetta verði skoðað nánar í framhaldinu. Mögulega hafi verið hægt að bregðast betur við en það muni koma í ljós.

„Ég vil ekki meina að hlutirnir hafi beinlínis farið úrskeiðis. Nú erum við bara að tala um það að við sjáum að þetta gat gerst og við viljum þá fara yfir okkar viðbragð, hvað hefðum við geta gert sem hefði gert okkar viðbragð snarpara og skilvirkara,“ segir Bergþóra.

Vegagerðin á fulltrúa í nýskipuðum starfshópi innviðaráðherra en formaður umhverfis- og samgöngunefndar Alþingis velti því fyrir sér í hádegisfréttum, eftir fund með ráðherranum, hvort að innviðir að Keflavíkurflugvelli hafi einfaldlega ekki verið byggðir upp á sama hraða og flugstöðin sjálf.

„Við getum talað um það almennt að við erum búin að byggja upp nýjan atvinnuveg, sem er ferðaþjónustan, á kannski tólf til fimmtán árum og við náum ekki að fylgja í innviðauppbyggingunni eins hratt og þyrfti, það vitum við. Reykjanesbrautin er bara einn af þeim þáttum,“ segir Bergþóra um innviðauppbyggingu. 

„Það er eitt af því sem við munum rýna, hvort það megi útbúa þessi mannvirki til þess að þau taki minna á sig,“ segir hún enn fremur.