Aðalsteinn vill stíga til hliðar í deilu SA og Eflingar

Landsréttur komst í dag að þeirri niðurstöðu að Efling þurfi ekki að afhenda sáttasemjara félagatal sitt vegna miðlunartillögu. .

Aðalsteini Leifssyni, ríkissáttasemjara, þykir það sérstakt að Landsréttur meti það sem svo að honum hafi verið heimilt að leggja fram tillöguna og kveða á um hvernig atkvæðagreiðsla færi fram en ekki að knýja á um að atkvæðagreiðslan eigi sér stað með því að nálgast kjörskrána hjá Eflingu. 

„Þetta er dálítið sérstök staða, óvenjuleg staða, sem ég bjóst alls ekki við. Hún er líka fordæmalaus þannig maður veltir fyrir sér hvaða markmiðum hægt er að ná með tillögunni vegna eðli málsins samkvæmt er hún sett fram sem síðasta úrræði í hörðum og erfiðum kjaradeilum. En núna liggur fyrir að það er ekki hægt að framkvæma atkvæðagreiðslu um miðlunartillögu ef annar hvor aðilinn neitar að afhenda kjörgögn til þess að það geti gerst,“ segir Aðalsteinn. 

Viðtalið við Aðalstein má sjá í heild sinni hér fyrir neðan. 

Ekki á leið til Hæstaréttar

Hann segir að fyrir hafi legið samkomulag við Eflingu um að taka málið ekki til Hæstaréttar, hvernig sem það færi í Landsrétti, og því væri um fullnaðarniðurstöðu að ræða í málinu. Hann velti þó fyrir sér hvort það hafi verið rétt ákvörðun að gera slíkt samkomulag.

„Það má alltaf spyrja sig að því eftir á hvort það hafi verið skynsamlegt en það þarf líka að horfa til þess að öllu jöfnu þá tekur talsverðan tíma að fá niðurstöðu þar, sérstaklega ef að aðilar vinna ekki saman. Þannig miðlunartillagan er stödd á milli steins og sleggju,“ segir Aðalsteinn.

Sólveig Anna Jónsdóttir, formaður Eflingar, hefur undanfarnar vikur kallað eftir því að Aðalsteinn segi sig frá málinu. Síðast í dag eftir að niðurstaða var ljós.

„Efling hefur sett fram þá kröfu að hann segi sig frá málinu. Í ljós þessarar niðurstöðu getur ekki annað verið en að hann geri það. Ég reikna með fregnum af því innan skamms,“ sagði Sólveig Anna á fjórða tímanum og reyndist sannspá.

Undir ráðherra komið

Aðalsteinn harmar að persóna hans hafi dregist inn í deilur Eflingar og Samtaka atvinnulífsins. Hann segist hafa lagt til að hann stígi til hliðar í samtali við Guðmund Inga Guðbrandsson, félags- og vinnumarkaðsráðherra, síðdegis.

„Mín skoðun er sú að undir þeim kringumstæðum að þá beri persónan alltaf að víkja fyrir málefninu. þess vegna nefndi ég við félags- og vinnumarkaðsráðherra í dag að það kunni að vera skynsamlegt að skipa sérstakan sáttasemjara í þessari deilu, eða sáttanefnd. Þannig að ég stigi til hliðar í þessari tilteknu deilu og gefi keflið áfram til annarra að reyna að finna lausn fyrir samfélagið. Ráðherrann er væntanlega að velta því fyrir sér núna en það var mín tillaga,“ segir Aðalsteinn.

Kemur ekki til greina að segja af sér í starfi?

„Nú erum við með marga bolta á lofti hjá Ríkissáttasemjara. Hér var skrifað undir tíu ára samning sjómannafélags Íslands og Samtaka fyrirtækja í sjávarútvegi í morgun. Sem var framhald af tíu ára samning sem öll önnur sjómanna og skipstjórnarfélög skrifuðu undir fyrir helgi. Svo eru fundir í fimmtán öðrum kjaradeilum áformaðir á næstu dögum. Þannig ég ætla að passa upp á að allir boltar haldist á lofti og við gefum sem besta þjónustu fyrir íslenskt samfélag,“ segir Aðalsteinn að lokum.