„Þessum við­ræðum verður alla­vega ekki slitið af sátta­semjara“

Fundað hefur verið í Karphúsinu frá því í morgun. Aðspurður um það hvort Efling og SA séu að færast nær hvort öðru segir Ástráður Haraldsson, settur ríkissáttasemjari, að viðræðurnar séu að fara í rétta átt.

„Ég skal ekki alveg segja. Það er allavega þannig að við erum að leita hófana með það hvort við getum fundið út úr því að koma okkur inn í svona alvöru kjarasamningsviðræður. Á meðan við tosumst í rétta átt þá hljótum við að færast eitthvað nær, ég held að það sé þannig. En við erum alls ekki komin þangað.“

Eruði strax að taka á viðkvæmustu blettunum í þessu?

„Það sem málið hefur kannski dálítið snúist um er að af hálfu Eflingar hefur verið lögð áhersla á það að þyrfti að gera kjaramamning sem tæki í meira mæli mið af þeirra tilteknu aðstæðum heldur en SGS kjarasamningarnir gera. Það er meðal annars það sem menn hafa verið að reyna að skoða hvort hægt sé að koma í kring.“

Ástráður segir að viðræðurnar sé ennþá einfaldar í sniðum. Viðræður milli undirhópa, þar sem fulltrúar beggja aðila sitja saman og ræða málin, eru ekki hafnar.

„Það er alls ekki komið út í slíka vinnu eins og myndi gerast þegar alvöru kjarasamningsviðræður koma í gang. Viðræðunefndir fulltrúanna hittast og þar fer aðalvinnan fram, í mjög fámennum hópi. Svo reyni ég að leggja lið eftir megni. En það eru engar fleiri undirnefndir.“

Áttar sig á því að það liggur á 

Ljóst er að klukkan tifar. Verkföll olíubílstjóra og fjölmargra hótelstarfsmanna hófust í gær og áhrif þess voru ekki lengi að koma fram. Stax í gær fór eldsneyti að klárast á nokkrum bensínstöðvum og ferðaþjónustan óttast að túristar verði heimilislausir um helgina.

Varðandi það hversu langan tíma er hægt að gefa samtalinu sem er að eiga sér stað núna segir Ástráður:

„Ég veit það ekki og ég hef ekki myndað mér neina skoðun á því og ég satt að segja átta mig ekki alveg á því. En ég átta mig á því að það liggur á og það er mikilvægt að aðilarnir nái saman sem allra fyrst. Á meðan við náum að tosast í rétta átt þá höldum við áfram. Þessum viðræðum verður allavega ekki slitið af sáttasemjara ríkisins.“

Þá segir Ástráður að miðlunartillaga sem Aðalsteinn Leifsson lagði fram sé ekki á borðinu eins og stendur.

„Hún er ekki til umræðu núna.“

Og verður hún það ekki?

„Það má guð vita.“