Þetta kemur fram á vef Samkeppniseftirlitsins. Forsagan er sú að árið 2017 gerði bankinn sátt við eftirlitið vegna rannsóknar sem hófst í tilefni af kvörtunum smærri keppinautar. Í þeirri sátt var bankanum gert að ráðast í aðgerðir til að efla samkeppni í almennri viðskiptabankaþjónustu við einstaklinga og lítil fyrirtæki.
Ein grein sáttarinnar kveður á um að lagt yrði bann við uppgreiðslugjöldum á lánum til einstaklinga og lítilla fyrirtækja sem bera breytilega vexti. Við eftirfylgni Samkeppniseftirlitsins vegna sáttarinnar vöknuðu grunsemdir um að framkvæmd bankans samkvæmt þessu skilyrði væri ábótavant. Hóf Samkeppniseftirlitið því athugun á þessu í ágúst á síðasta ári.
Niðurstaða þeirrar athugunar er að bankinn viðurkennir að hafa brotið gegn banninu. Bankinn hafði í níu lánasamningum sem bera breytilega vexti kveðið á um uppgreiðslugjald eða ígildi þess. Þá innheimti bankinn gjaldið í einu af þessum tilvikum.
Er því Arion banka gert að greiða áttatíu milljónir króna í sekt. Hafði það verulega þýðingu við mat á fjárhæð sekta að Arion banki sýndi ríkan samstarfsvilja og stytti það rannsókn og málsmeðferð Samkeppniseftirlitsins.
Bankinn hefur farið yfir alla lánaferla sína og m.a. uppfært skjalgerðarferla, komið á sjálfvirkri vöktun vegna skráningar í útlánakerfi bankans og aukið fræðslu fyrir starfsfólk.
