Ekki dramatískt lag enda ekki dramatísk máltíð

SS 4. maí 2023 09:15

Í tíunda þætti Skúrsins flytur Gígja Marín frá Hveragerði sína útgáfu af SS pylsulaginu.

Seinni umferð Skúrsins hófst í síðustu viku en í þáttunum keppa sex flytjendur um bestu nýju útgáfuna af SS pylsulaginu auk þess sem keppt er um besta frumsamda lagið.

Í fyrri umferð kynntumst við flytjendunum sex og heyrðum brot úr fyrstu útgáfum laga þeirra. Nú hefur hópurinn haft góðan tíma til að fínpússa bæði lögin og gera ýmsar breytingar á þeim.

Í tíunda þætti Skúrsins er rætt við Gígju Marín sem leyfir okkur að heyra lokaútgáfu sína af SS pylsulaginu. „Ég vann lokaútgáfuna með Stefáni Þorleifssyni sem kennir mér tónsmíðar. Við gerð hennar var ég helst að spá í að bæta inn strengjum, mögulega bassa og kannski fleiri röddum,“ segir Gígja Marín.

„Það er krefjandi að finna nýja nálgun á þessu lagi,“ bætir Stefán við. „Þetta má ekki vera of dramatískt því þetta er ekki dramatísk máltíð.“ Stefán lagði einnig til að smá gítar yrði bætt inn í lagið.

Klippa: Skúrinn - Leitin að nýja SS pylsulaginu: Tíundi þáttur

Sigurvegarinn hlýtur að launum tvær milljónir króna, annað sætið hlýtur eina milljón og þriðja sætið fimm hundruð þúsund. Til viðbótar hljóta höfundar besta frumsamda lagsins eina milljón króna.

Lokaútgáfur næstu flytjenda verða kynntar í vikunni.

Að loknum sjötta þætti seinni umferðar munu lesendur Vísis og dómnefnd velja þrjú SS pylsulög áfram og velja besta frumsamda lagið.

Landsmenn munu heyra útgáfurnar þrjár sem komast í lokaúrslit í sjónvarpi og útvarpi í sumar og í ágúst verður kosið um sigurvegarann í keppninni um besta nýja SS pylsulagið.

Skúrinn Tónlist