Sú fyrsta sem fær tíu í ein­kunn fyrir meistara­vörn

Guðrún Sólveig er öllu vön þegar kemur að háum einkunnum og jafnvel sögulegum. Fyrir tveimur árum brautskráðist hún með BA próf frá deildinni með hæstu einkunn sem gefin hefur verið í lagadeild Háskóla Íslands, 9,33.

Sjálf segist Guðrún ekki hafa búist við slíkum árangri.

„Maður býst alltaf við því að ganga verr en gengur síðan,“ segir hún í samtali við Vísi.

Prófdómari var Þorgeir Örlygsson, fyrrverandi forseti hæstaréttar.

Vernd eignarréttar skoðuð

Ritgerð Guðrúnar ber titilinn Sambúð 72. gr. stjórnarskrárinnar og 1. gr. 1. viðauka við mannréttindasáttmála Evrópu: Standa rök til breytinga á nálgun íslenskra dómstóla? og fjallar um samspil 72. greinar stjórnarskrárinnar og 1. greinar 1. viðauka við mannréttindasáttmála Evrópu. Í ritgerðinni er vernd eignarréttar samkvæmt íslenskum rétti borin saman við vernd eignarréttar samkvæmt mannréttindasáttmála Evrópu. Hún kannar hvort rök standi til þess að breyta aðferð íslenskra dómstóla við mat á stjórnskipulegu gildi eignarskerðinga með hliðsjón af nýlegri þróun á vettvangi Mannréttindadómstólsins. Áhugasamir geta lesið hana á Skemmunni.

Lokamarkmiðið að verða dómari

Samhliða laganáminu hefur Guðrún unnið á LEX lögmannastofu síðastliðin tvö ár.

„Mér líður mjög vel þar þannig að ég ætla að halda áfram að vinna þar, örugglega í málum á sviði eignarréttar.“

Guðrún heldur því opnu að þreyta lögmannsréttindin næsta vor. Jafnvel fari hún til Bandaríkjanna í LL.M nám eftir að hafa aflað sér smá reynslu heima á Íslandi.

Aðspurð hvort hún eigi sér eitthvað draumastarf í lagaheiminum segist hún eiga það lokamarkmið að verða dómari. En það verði þó ekki strax.

Keppir í málflutningi á dönsku

Að auki mun Guðrún ásamt fjórum öðrum laganemum Háskóla Íslands keppa í norrænu málflutningskeppninni í næsta mánuði. Þar flytja þau mál á dönsku í kappi við nema frá hinum Norðurlöndunum.

„Við erum að keppa á dönsku sem er mjög fyndið því maður kann eiginlega bara einhverja menntaskóladönsku,“ segir Guðrún sem þó talar sex tungumál.

Góður leiðbeinandi lykilatriði

Guðrún tekur það sérstaklega fram að hún á leiðbeinanda sínum Víði Smára Petersen, dósent við lagadeild Háskóla Íslands mikið að þakka.

„Hann vakti áhuga minn algjörlega á þessu efni og í rauninni bara eignarréttinum sem réttarsviðs. Það væri erfitt að gera þetta með einhverjum öðrum leiðbeinanda.“

Hún brýnir mikilvægi góðs og áhugasams leiðbeinanda.