Mikil­vægt að ekki verði til tvær mis­munandi þjóðir í landinu

Mikill fjöldi þeirra sem sækja um alþjóðlega vernd á Íslandi dvelur í Reykjanesbæ og hafa bæjaryfirvöld kallað eftir breytingum og sagt innviði sveitarfélagsins sprungna.

Í dag undirrituðu undirrituðu félags- og vinnumarkaðsráðherra og fulltrúar bæjarins og Vinnumálastofnunar aðgerðarætlun þar sem meginmarkmiðið er að draga úr fjölda hælisleitenda í bænum. Einnig á að bæta þjónustu við þá hælisleitendur sem þar eru fyrir til að auka virkni þeirra og vellíðan á meðan þeir bíða eftir afgreiðslu umsókna sinnar.

Félags- og vinnumarkaðsráðherra tekur undir mat forystumanna bæjarins um álagið sem fylgi fjölda þeirra sem bíða svara um stöðu umsókna sinna.

„Við erum öll sammála um að við vildum geta fækkað fólki sem hér er að sækja um alþjóðlega vernd, hraðar en Vinnumálastofnun sér fyrir sér að verði hægt. Þannig að ákall þeirra, sem ég skil, er að hlutirnir gerist hraðar í þeim efnum,“ segir Guðmundur Ingi Guðbrandsson.

Hann segist hinsvegar vera hreinskilinn varðandi það að forsendur bjóði ekki upp á það eins og staðan er núna.

„En við erum að vinna að lausnum og ég vona að þetta geti gerst hraðar en gert er ráð fyrir í þessari aðgerðaráætlun en það verður að koma i ljós. Ég er mjög ánægður með að við skulum hafa ákveðið í sameiningu að koma með áætlun því þá vitum við hvert við ætlum að stefna.“

Aðgerðaráætlunin er í sextán liðum og meðal þess sem stendur til eru bættar samgöngur og margs konar tómstundaúrræði. Sett verður á laggirnar sérstök virknimiðstöð í Officer klúbbnum á Ásbrú þar sem boðið verður upp á námskeið, smiðjur og fjölbreytta dagskrá.

Einnig er stefnt að því að börn á grunnskólaaldri sæki nám í Officer klúbbnum áður en þau fara í hið almenna skólakerfi. Guðmundur Ingi telur að þau muni eiga auðveldara með að aðlagast samfélaginu þegar þau eru búin að vera í slíku úrræði.  

Einingarhús til skoðunar

Þá stendur til að koma upp einingarhúsum fyrir allt að þúsund manns í öðrum sveitarfélögum. 

„Þetta er húsnæði sem er svipað og færanlegar kennslustofur, eða Mariot hótelið í Keflavík. Þetta er til þess að geta þjónustað fólkið betur. Þá er það á einum stað á meðan það bíður eftir að fá svar um hvort það fái vernd hér eða ekki,“ segir Guðmundur Ingi.

Umræður standi yfir við Reykjavíkurborg um lóðir undir einingahúsin en einnig verði leitað til annara sveitafélaga.

„Við erum ekki að skoða þetta með Reykjanesbæ enda erum við að stefna að því að fækka fólki hlutfallslega þar miðað við annars staðar.“

Tækifæri fólgin í að taka vel á móti fólki

Aðspurður hvort hann sé sammála sjónarmiðum nýs dómsmálaráðherra, Guðrúnar Hafsteinsdóttur, í málaflokknum, segist Guðmundur Ingi hafa verið skýr varðandi það að deila ekki öllum skoðunum Sjálfstæðismanna þegar kemur að útlendingamálum.

„Við reynum hins vegar að leysa úr okkar ágreiningsmálum við ríkisstjórnarborðið. Það var gengið frá löggjöf í fyrra vor sem var málamiðlun, og núna vinnum við eftir þeirri löggjöf. Við erum hins vegar öll sammála um að fjöldi innflytjenda á Íslandi sem hefur komið og aukist mjög mikið á undanförnum árum er að búa til nýjar áskoranir á íslenskt samfélag.“

Þá sérstaklega þá áskorun að hér verði ekki til tvær mismunandi þjóðir í landinu, þar sem innflytjendur sinna fyrst og fremst láglaunastörfum. Að þessu þurfum við að vinna gegn.

Hann segir eðlilegt að umræða um útlendingamálin sé mjög mikil. Hins vegar megi ekki gleyma þeirri stðreynd að flóttfólk sé aðeins um tíu prósent af heildarfjölda innflytjenda. 

„Ef við tökum bara árið í fyrra komu hingað um 15 þúsund manns. Aðeins 3.500 af þeim voru flóttamenn, rétt einn fimmti. Við megum heldur aldrei gleyma því að hagvöxtur á Íslandi er fyrst og fremst drifinn áfram af innfluttu vinnuafli. Svo það eru líka tækifæri fólgin í því að taka vel á móti fólki. Það eflir samfélagið okkar og heldur uppi lífsgæðum.“

Vísar boltanum yfir á önnur sveitarfélög

Friðjón Einarsson, formaður bæjarráðs Reykjanesbæjar var hæstánægður með áætlunina.

„Það kemur skýrt fram að það á að halda vel utan um hælisleitendur sem ekki hefur verið gert áður. Það fara miklir fjármunir í þetta og þetta er mikið framfaraskref. Við erum mjög ánægð með samstarfið við Vinnumálastofnun.“

Hann segir jákvæðustu fréttirnar þær að í áætluninni sé samþykkt að fækka hælisleitendum í Reykjanesbæ og skýtur fast á önnur sveitarfélög.

„Það er baráttumál sem við erum búin að berjast fyrir í mörg ár. Ég verð að nota tækifærið og þakka Guðmundi Inga fyrir það en um leið að skamma önnur sveitarfélög á Íslandi fyrir að rífa sig ekki betur í gang að hjálpa okkur í þessu verkefni. Þannig ég vísa boltanum yfir til þeirra. Sérstaklega ætla ég að nefna Kópavog og Hafnarfjörð í þessu samhengi og önnur sveitarfélög úti á landi.“