Vel heppnað golfmót FM957

FM957 4. júlí 2023 13:09

Árlegt golfmót FM957 fór fram síðasta föstudag á Hamarsvellinum, skammt fyrir utan Borgarnes. Rúmlega 80 manns tóku þátt en spilað var Texas Scramble í miðnætursólinni. Glæsilegir vinningar voru veittir fyrir þrjú efstu sætin. Mynd/Gunnhildur Lind.

Árlegt golfmót FM957 var haldið síðasta föstudag á Hamarsvellinum, skammt fyrir utan Borgarnes.

Spilað var Texas Scramble í miðnætursólinni og voru veittir glæsilegir vinningar fyrir þrjú efstu sætin en þátturinn FM95BLÖ var í beinni útsendingu frá mótinu.

Það var starfsfólk FM957 sem sáu um skipulag golfmótsins en samstarfsaðilar voru Stella, Celsius, Loop, Heimkaup, CBD Reykjavík, Opal og Garmin.

Starfsfólk FM957 sá um skipulag golfmótsins. Mynd/Gunnhildur Lind.

Hlustendur FM957 gátu skráð sig til leiks og voru rúmlega 80 manns dregnir úr pottinum að sögn útvarpskonunnar Kristínar R. Jónsdóttur, eins af skipuleggjendum golfmótsins. „Þrátt fyrir slæma spá fengum við æðislegt veður og þetta var sjúklega skemmtilegt mót,“ segir Kristín. Eftir mótið var þátttakendur boðið til léttrar veislu í skálanum þar sem boðið var upp á léttar veitingar og góða stemningu fram á kvöld. „Það voru þeir Sigurður Orri fjölmiðlamaður og Guðjón Smári Idol stjarna sem sáu um að halda uppi fjörinu og er óhætt að segja að þeim hafi tekist það. Það voru ánægðir keppendur sem héldu heim um miðnætti.“

„Þrátt fyrir slæma spá fengum við æðislegt veður og þetta var sjúklega skemmtilegt mót,“ segir útvarpskonan Kristín R. Jónsdóttir, ein af skipuleggjendum golfmótsins. Mynd/Gunnhildur Lind.

Utan vinninga fyrir efstu þrjú sætin fengu allir keppendur glæsilegar teiggjafir áður en mótið hófst en meðal þeirra voru FM957 kúlur og golfhandklæði, bjór frá Stellu, snakk frá Bugles, Ópal pakki frá Nóa Siríus, Loop húfur, Leppin drykkir og Ópal skot.

Auk þess voru nokkrir glæsilegir vinningar dregnir úr öllum skorkortum og því áttu allir þátttakendur möguleika á vinningi óháð árangri.

Fyrirtækin sem gáfu vinninga á golfmótinu voru Garmin, 66°Norður, Sleepy, Klak, Pizzaofnar.is, Everest, Minigarðurinn, Arctic rafting, Origo, Ali, Fly over Iceland, BPro, Tres Locos, Krauma, Iceherbs, Tipsy og Ölgerðin.

Hér að neðan má sjá myndir frá mótinu sem Gunnhildur Lind tók:

Golf FM957