Fréttastofu barst ábending þess efnis að hávær orðrómur gengi nú um Dalvík, um að Fiskidagurinn mikli í ár yrði sá síðasti. Hátíðin er fer fram dagana 11. til 13. ágúst. Framkvæmdastjórinn botnar ekkert í sögusögnum um að hátíðin verði ekki haldin aftur að ári.
„Þetta hefur sannarlega verið hávært og við sem sitjum við borð framkvæmdanefndar lítum á hvorn annan og bara „Hvaðan kemur þetta og af hverju?““ segir Júlíus Júlíusson, framkvæmdastjóri Fiskidagsins.
Aldrei hafi komið til umræðu að hátíðin í ár yrði sú síðasta.
„Og við erum búin að hitta marga sem segja „Ég ætla að koma, þetta er nú síðasta skiptið.“ En ekki vissi ég það.“
Hátíðin fagnar nú 20 ára afmæli, þrátt fyrir að hafa verið haldin fyrst fyrir 23 árum. Næstu þrjú ár var hún slegin af vegna kórónuveirufaraldursins.
„Þannig að núna erum við loksins að halda upp á 20 ára afmælið. Og það er gaman að geta loksins farið af stað aftur.“
Renna blint í sjóinn með fjöldann
Von er á fjölda fólks til Dalvíkur, og einhverjir spenntir gestir þegar mættir.
„Það er alltaf rosalega erfitt fyrir okkur, þar sem við seljum enga miða eða neitt, að nefna. En við gerum bara ráð fyrir þessu meðaltali sem hefur verið, um þrjátíu þúsund manns. Það er bara þannig.“
Dagskrána á stóra sviðinu má sjá að neðan en auk þess má finna dagskrá á hátíðarsvæðinu og í bænum.
Dagskrá Fiskidagsins 2023
11:00 – Setning: framkvæmdastjóri Fiskidagsins mikla
11:05 – Fiskidagslagið: Matti og Friðrik Ómar & dans
11:10 – Litla Fiskidagsmessan: séra Erla Björk Jónsdóttir
11:20 – Tónlistarskólinn á Tröllaskaga: framtíðarstjörnur
11:45 – Dregið í ratleik Fiskidagsins mikla. Vertu á staðnum!
12:00 – Fiskidagslagið: Matti og Friðrik Ómar & dans
12:05 – Vinir okkar úr Latabæ: afmælisstuð
12:35 – Snævar og Erla
12:50 – Hljómsveitin Skandall
13:10 – Sæborg rokkar.
13:25 - Hlynur Snær og dætur: Fiskidagslagið ´23 og fl.
13:45 – Heiðrun: Svanfríður Jónasdóttir
14:15 - Ræðumaður dagsins: Guðni Th. Jóhannesson, forseti Íslands
14:25 – Teigabandið de luxe: Syngjum og dönsum með
14:55 – Fiskidagslagið: Matti og Friðrik Ómar & dans
15:05 - Okkar maður, Friðrik Ómar, ásamt gestum
15:25 - Tómið: Þröstur, Þorsteinn og félagar
15:40 - Salka Kvennakór: geislandi Sölkur
16:00 – Þjóðalagabandið Klisja
16:20 –Fiskidagsvinirnir frá Sunny Kef. Sunnuhvoll - Keflavík
16:50 – Fiskidagslagið: Matti og Friðrik Ómar & dans
16.55 – Lokaorð
17:00 – Fiskideginum mikla 2023 slitið
Mögulega geti gestirnir þó orðið enn fleiri, þar sem hátíðin hefur ekki farið fram síðan 2019.
„Og kannski út af þessari skrýtnu umræðu um að þetta sé síðasta skiptið, og það allt saman. Jú, jú, við eigum alveg von á því, en svo kemur þetta bara í ljós,“ segir Júlíus að lokum.
Fiskidagstónleikarnir fara svo fram að kvöldi Fiskidagsins á hafnarsvæðinu klukkan 21:45 og svo flugeldasýning rétt áður en klukkan slær miðnætti.
