Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Mér finnst skemmtilegast hvernig fólk tjáir sem með tísku. Þeir sem að þora að fara sínar eigin leiðir og standa upp úr eða út úr. Einnig að tískan í dag er svo fjölbreytt að allir geta fundið sinn stíl en í minningunni þá var það ekki þegar ég var að alast upp, það voru allir eins!
Hver er uppáhalds flíkin þín og af hverju?
Ég á eina uppáhalds flík sem að ég keypti í London fyrir um sjö árum. Það er rúskinnskápa frá Max Mara en það er merki sem ég elska þar sem það merki notar eingöngu hágæða efni. Ég er algjör „efnaperri“ og hef alltaf kunnað að meta góð efni, enda alin upp af saumakonu.
Eyðirðu miklum tíma í að velja föt hverju sinni?
Ekki dags daglega en ég get tekið syrpur og mátað allt í skápnum fyrir viss tilefni, þegar maður þarf á öllum sínum sjálfsstyrk að halda því maður tjáir sig með fötum og skóm.
Hvernig myndirðu lýsa stílnum þínum?
Frjálslegur með dass af lúxus. Ég reyni að klæða upp og niður flottu og fínu flíkurnar mínar. Ef maður á flotta skó og yfirhafnir þá er allt hægt.
Svo elska ég hælaskó og þeir sem að mig þekkja segja að ég eigi allt of mörg pör, er alls ekki sammála...
Mér finnst ég alltaf vera fínni í hælum, þeir geta líka verið misháir eftir tilefni. Svo skreytir maður sig með fylgihlutum, töskum, húfum og skarti.
Hefur stíllinn þinn breyst mikið í gegnum tíðina og hvernig þá?
Ég get ekki sagt að stíllinn minn hafi breyst mikið en kannski eru bara tilefnin önnur. Þegar maður er yngri þá þarf maður að vera með mikið af löðrandi kynþokkafullum fötum í skápnum. Ekki eins mikið af þeim í skápnum í dag en þó einstaka kjólar og toppar með opnum öxlum.
Hvaðan sækirðu innblástur í tískunni?
Mér finnst gaman að fara inn á Pinterest. Þar fæ ég hugmyndir til að raða saman úr skápnum mínum en þar er af nægu að taka. Það er líka gaman að fá götustílshugmyndir á ferðalögum, gaman að sitja á kaffihúsi eða bar og fylgjast með fólki í stórborgum.
Ertu með einhver boð og bönn þegar það kemur að klæðaburði?
Alls ekki – mér finnst samt ekki eins gaman að vera í stuttum pilsum, held að sú tíð sé liðin hjá mér.
Vil samt koma á framfæri að konur á mínum aldri eiga alls ekki að hlusta á að við eigum að klæða okkur einhvern veginn á annan hátt vegna aldurs. Vertu bara eins og þig langar og þér líður hverju sinni.
Hver er eftirminnilegasta flík sem þú hefur klæðst og af hverju?
Ætli það hafi ekki verið brúðarkjóllinn minn en hann var saumaður af mömmu og hannaður af mér, en hugmyndin var fengin að láni frá Donnu Karan. Anna María vinkona mín úr fluginu hjálpaði við að gera snið og er ég henni enn þakklát.
Keypti silkiflauel í New York og hann er enn flottur en það ekki hægt að segja um margt sem ég klæddist á þessum tíma.
Býrðu yfir einhverju góðu ráði þegar það kemur að tísku?
Góður stíll hefur ekkert að gera með pening og öfugt.
Finna bara föt sem að veita þér sjálfstraust því það ekkert flottara en þeir sem bera sig vel og eru ekkert á spá hvað öðrum finnst um sig.
