Þrettán starfs­­menn fylgdu um 180 Venesúela­búum heim

Þeir þrettán starfsmenn sem fóru með til Venesúela voru frá ólíkum stofnunum. Tveir starfsmenn voru frá Útlendingastofnun og níu frá stoðdeild ríkislögreglustjóra. Meðal starfsmanna stoðdeildar voru hjúkrunarfræðingur og túlkur. Auk þeirra fór einn starfsmaður Frontex eða Landamæra- og strandgæslustofnun Evrópu og einn sjálfstæður eftirlitsaðili á vegum Frontex.

Flogið var frá Íslandi 15. nóvember og kom starfsfólk heim þann 19. nóvember. Flogið var beint til Caracas frá Íslandi, en ekki beint til Íslands aftur. Íslenska starfsfólkið flaug til Madríd á Spáni með vélinni, en með viðkomu í Dóminíska lýðveldinu. Frá Madríd fór starfsfólkið í áætlunarflugi til Íslands.

Þetta kemur fram í svari dómsmálaráðuneytis til fréttastofu.

Nær allur kostnaður endurgreiddur

Þar kemur einnig fram að laun starfsmanna Útlendingastofnunar og ríkislögreglustjóra voru greidd úr ríkissjóði. Dagpeningar íslenska starfsmanna voru rúmar 1,9 milljónir íslenskra króna en Frontex endurgreiðir ríkissjóði kostnaðinn, sem og kostnað vegna farmiða og rútuferða í og frá Madríd. Frontex greiðir allan kostnað við flugið sjálft.

Ekki fengust upplýsingar um mánaðarlaun ríkisstarfsmanna sem fóru í ferðina en samkvæmt svörum dómsmálaráðuneytis er um að ræða fastakostnað „sem breytist ekki hvort sem ferðin er farin eða ekki.“

Þá kostaði fjárhagsaðstoð við sjálfviljuga heimför á grundvelli laga um útlendinga um 71,5 milljón íslenskra króna.

Skuldbindingar tengdar Schengen-samstarfi

Ísland greiðir til Frontex 1,1 milljón evra á þessu ár. Það samsvarar um 167 milljónum íslenskra króna. Framlagið er reiknað út frá vergri þjóðarframleiðslu og er um að ræða hluta þeirra skuldbindinga sem fylgja Schengen-samstarfinu.

„Hlutverk Frontex er mjög fjölþætt og snertir nær alla þætti ytri landamæra Íslands svo sem tækjakaup, þjálfun og verkferla og snertir landamæraeftirlit, innflutning, smygl, mansal og skipulagða brotastarfsemi þvert á landamæri. Á móti framlagi Íslands hafa fengist styrkir vegna kennslu, tækjabúnaðar og ýmiss konar landamæraverkefna, auk þess sem Frontex greiðir fyrir beint framlag Íslands til verkefna erlendis,“ segir í svari ráðuneytisins.

Annað leiguflug í janúar

Í frétt á vef stjórnarráðsins í gær kom fram að á þessu ári hafi, fyrir þessa ferð, 135 Venesúelabúum verið veitt aðstoð við heimför. Þá í áætlunarflugi.

Vegna mikils fjölda Venesúelabúa á landinu sem hefur óskað eftir aðstoð við heimför er stefnt að öðru leiguflugi í janúar. 

Fram kom í tilkynningunni að þátttakendur í því flugi verði upplýstir um móttöku á flugvellinum í Caracas og að hún gæti orðið svipuð og í ferðinni um miðjan nóvember. Nokkuð uppþot átti sér stað á flugvellinum við heimkomu þegar einhver hluti fólksins fékk ekki að fara frjáls ferða sinna. Í tilkynningu ráðuneytis segir að sendur hafi verið tölvupóstur á alla sem fóru með í flugið og kannað um hagi þeirra.

„Þegar hafa borist 83 svör sem ná til 99 einstaklinga. Þeir sem hafa svarað segjast vera frjálsir ferða sinna og vera með venesúelsk vegabréf sín. Nær allir voru komnir á áfangastað eða á leið þangað þegar þeir svöruðu póstinum, auk þess sem einn var kominn til annars ríkis. Þá segjast nær allir hafa ferðastyrk íslenskra stjórnvalda í fórum sínum; þrír segja að peningarnir hafi verið teknir af þeim og fjórir til viðbótar segja að hluti peninganna hafi verið tekinn,“ segir í tilkynningunni sem má lesa hér.