Varað við asa­hláku, hálku og miklum leysingum

Á vef Veðurstofunnar segir að það verði skúrir eða él á sunnan- og vestanverðu landinu en að mestu þurrt norðaustantil.

„Seint í dag dregur úr vindi og hitaskil koma að suðurströnd landsins. Í kvöld verður hiti orðinn 4 til 8 stig sunnan- og vestanlands með rigningu og hláku, gular viðvaranir vegna asahláku taka gild ein af annarri sitthvoru megin við miðnætti. Úrkomusvæðið fer svo norður yfir landið en þar sem hiti verður nær frostmarki norðantil verður slydda eða snjókoma,“ segir á vef Veðurstofunnar.

Gular viðvaranir taka gildi á Suausturlandi klukkan 20, Faxaflóasvæðinu og Suðurlandi klukkan 22 í kvöld og 23 á höfuðborgarsvæðinu. Eru þær allar í gildi til um klukkan 6 á morgun.

Búast má við miklum leysingum, auknu afrennsli og vatnavöxtum í ám og lækjum. Mikil hálka getur myndast þar sem rignir á klakabunka eða þjappaðan snjó. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Fólk er hvatt til að sýna aðgát og fylgjast með veðurspám.

Á morgun gengur síðan í suðvestan 13-23 m/s með skúrum og síðar éljum þegar tekur að kólna aftur. Hvassast verður í éljahriðjum suðvestantil á landinu. Frost 0 til 6 stig annað kvöld.

Veðurhorfur á landinu næstu daga

Á föstudag: Gengur í suðvestan 15-23 m/s og kólnar með éljum, en léttir til á Norðaustur- og Austurlandi. Frost 0 til 7 stig síðdegis.

Á laugardag: Norðan og norðvestan 5-13 m/s, en suðvestan 13-20 sunnantil fram eftir degi. Víða él og frost 0 til 9 stig.

Á sunnudag: Norðaustlæg eða breytileg átt 5-10 m/s og dálítil él, en bjart fram eftir degi sunnantil. Frost 2 til 12 stig, kaldast norðanlands.

Á mánudag: Norðlæg eða breytileg átt og dálítil él á víð og dreif. Kalt í veðri.

Á þriðjudag og miðvikudag: Útlit fyrir norðlæga átt með él, en víða léttskýjað um sunnanvert landið.