Glódís Rún og Breki frá Austurási sigruðu slaktaumatöltið

Keppni í slaktaumatölti í Meistaradeild Líflands 2024 fór fram fimmtudaginn 8. febrúar síðastliðinn. Það er óhætt að segja að keppnin hafi verið virkilega spennandi, frábærar sýningar sáust og var keppnin hörð allt til enda. Horses of Iceland bauð gestum í stúkuna og var Veisluþjónusta Suðurlands á sínum stað í veislusal reiðhallarinnar með glæsilegt hlaðborð sem knapar og aðrir gestir gæddu sér á.

Tveir knapar keyptu sér uppboðsæti fyrir kvöldið ásamt því að eitt lið tefldi fram villiketti sem gerði kvöldið enn skemmtilegra. Það voru þau Þorgeir Ólafsson og Auðlind frá Þjórsárbakka sem riðu á vaðið og hófu veisluna. Að lokinni forkeppni voru það þau Jakob Svavar og Hrefna frá Fákshólum ásamt Glódísi Rún og Breka frá Austurási sem leiddu með sömu einkunn, en þar á eftir voru Ásmundur Ernir og Hlökk frá Strandarhöfði, Aðalheiður Anna og Flóvent frá Breiðstöðum, Helga Una og Ósk frá Stað og síðastur að næla sér í sæti í A-úrslitum var Skagfirðingurinn Bjarni Jónasson á Hörpu Sjöfn frá Hvolsvelli.

Að lokinni forkeppni var ljóst að úrslitin yrðu mjög spennandi þar sem stutt var á milli knapa og tveir knapar stóðu efstir og því með öllu óljóst hver myndi standa uppi sem sigurvegari. Eftir frjálsu ferðina á tölti voru það Jakob Svavar og Hrefna frá Fákshólum sem leiddu nokkuð örugglega og þeirri forystu héldu þau eftir hæga töltið. Fyrir slaka tauminn voru Ásmundur Ernir og Glódís Rún ekki langt undan. 

Það mátti heyra saumnál detta í höllinni á meðan slaki taumurinn fór fram, spennan var slík. En það varð svo ljóst eftir frábæra sýningu á slaka taumnum að Glódís Rún og Breki frá Austurási stóðu uppi sem sigurvegarar í Slaktaumatölti Meistaradeildar Líflands 2024 með einkunnina 8.04! Rétt á hæla þeirra komu Jakob Svavar og Hrefna frá Fákshólum með einkunnina 8.00. 

Þriðju voru Ásmundur Ernir og Hlökk frá Strandarhjáleigu með 7.88. Í fjórða sæti voru sigurvegarar frá því í fyrra, Aðalheiður Anna og Flóvent frá Breiðstöðum með 7.71, Bjarni Jónasson og Harpa Sjöfn frá Hvolsvelli í því fimmta með 7.63 og í því sjötta Helga Una og Ósk frá Stað með 7.25.

Liðakeppni kvöldsins sigraði lið Hjarðartúns með 47.5 stig en liðið var með tvo knapa í úrslitum, þau Jakob Svavar Sigurðsson og Helgu Unu Björnsdóttur. Elvar Þormarsson keppti einnig fyrir lið Hjarðartúns og voru þeir í 12. sæti eftir frumraun sína í keppni í slaktaumatölti. Einstaklingskeppnina leiðir Jakob Svavar með 22 stig.

Næst verður keppt í Meistaradeild Líflands 29. febrúar í HorseDay höllinni Ingólfshvoli þegar keppt verður í fimmgangi. Í fyrra voru það Sara Sigurbjörnsdóttir og Flóki frá Oddhóli, síðar heimsmeistarar, sem stóðu uppi sem sigurvegarar. Það er ljóst að Flóki og Sara mæta ekki til leiks þannig það verður spennandi að sjá hvort hún muni mæta til að endurheimta titilinn en það kemur í ljós á þriðjudaginn þegar dregið verður í rásröð í beinni útsendingu hjá Alendis.

TOYOTA SELFOSSI mun taka vel á móti ykkur en þau ætla bjóða áhorfendum FRÍTT í höllina! Við hvetjum alla hestaáhugamenn til að mæta tímanlega og um leið njóta frábærra veitinga í góðum félagsskap. Veisluþjónusta Suðurlands verður á staðnum með glæsilegt hlaðborð ásamt öðrum veitingum. Sé pantað fyrir fram á hlaðborðið fylgir í kaupbæti frátekið sæti á besta stað í stúkunni. Pantanir fara fram HÉR en nánari upplýsingar má senda á info@ingolfshvoll.is. Þau ykkar sem ekki komast getið tryggt ykkur áskrift á Alendis.

​Sjáumst í HorseDay höllinni fimmtudaginn 29. febrúar.

Staðan í liðakeppni

1. Hestvit / Árbakki 97 stig

2. Hjarðartún 96 stig

3. Ganghestar / Margrétarhof 86 stig

4. Hrímnir / Hest.is 61.5 stig

5. Top Reiter 45 stig

6. Þjóðólfshagi / Sumarliðabær 39.5 stig

​7. Austurkot / Pula 36 stig

Staðan í einstaklingskeppni

1. Jakob Svavar Sigurðsson 22 stig

2. Glódís Rún Sigurðardóttir 20 stig

3. Aðalheiður Anna Guðjónsdóttir 17 stig

4. Gústaf Ásgeir Hinriksson 10 stig

5. Helga Una Björnsdóttir 10 stig

NIÐURSTÖÐUR - T2 SLAKTAUMATÖLT

Sæti - Knapi - Hross - Lið - Einkunn

Dagskrá vetrarins: