Fékk að­stoð frá fyrrum þjálfara Tigers en besta ráðið kom frá dótturinni

McIlroy, sem situr í öðru sæti heimslistans, getur orðið aðeins sjötti kylfingurinn í sögunni til að vinna öll fjögur risamótin takist honum að vinna Masters-mótið sem hefst eftir slétta viku.

Norður-Írinn hefur hins vegar ekki verið upp á sitt besta undanfarið og á yfirstandandi tímabili hefur honum aðeins einu sinni tekist að lenda í einu af efstu tuttugu sætunum á PGA-mótaröðinni. Þessi 34 ára gamli kylfingur hefur því leitast eftir aðstoð frá Butch Harmon.

Harmon var áður þjálfari Tiger Woods og vann með honum til ársins 2002. Á þeim tíma sem þeir unnu saman vann Tiger sína fyrstu átta risatitla og var efstur á heimslistanum þegar leiðir þeirra skildu.

„Ég fór í golftíma hjá Butch Harmon í síðustu viku,“ sagði McIlroy í hlaðvarpinu I Can Fly. „Ég hef hitt hann nokkrum sinnum í gegnum árin. Kannski einu sinni á nokkurra ára fresti. Ég hef bara heyrt í honum og beðið um að fá að hitta hann og hvort hann geti bent mér á eitthvað sem honum finnst að ég geti lagað.“

Þrátt fyrir að hafa fengið golfkennslu frá hinum margreynda Butch Harmon segir McIlroy þó að besta ráðið sem hann hafi fengið hafi komið frá þriggja ára dóttur hans.

„Þegar ég var að leggja af stað upp á flugvöll til að hitta Harmon í Las Vegas spurði þriggja ára dóttir mín mig hvert ég væri að fara og ég sagði henni að ég væri að fara í golfkennslu. Hún sagði: „Pabbi, þú kannt alveg að spila golf“ og það er líklega besta ráðið sem ég hef fengið seinustu þrjú ár,“ bætti McIlroy við.