Nafn konunnar flúrað á það allra heilagasta

„Ég grínast með það, og meina það líka, að ég á bara andlitið og punginn eftir. Annað er búið,“ segir Össur sem fór yfir þessi mál í Bítinu á Bylgjunni í morgun.

Hann segir það ekki úr myndinni að klára það en konan hans sé ekki hrifin af því að hann fái sér í fleiri flúr í andlitið. Fyrir er hann með í eyranu, undir auganu og á kinninni.

Um óþægilegasta staðinn til að fá sér húðflúr segir Össur að rasskinnarnar séu ekki þægilegar, eða aftan á kálfana. Þá sé það heldur ekki þægilegt í kringum geirvörturnar og naflann eða niður eftir hryggjarsúlunni.

Heimir Karlsson þáttastjórnandi spurði þá fyrst hann væri búinn með punginn hvort hann ætti „hitt dótið sem fylgir pungnum“ eftir og meinti lim Össurar.

„Það er búið,“ segir Össur. Það hafi ekki verið svo slæmt. Hann hafi gert það sjálfur.

„Það var ekki eins og maður myndi halda,“ segir Össur og að ekkert annað hafi komið til greina en að setja nafnið á konunni sinni, Lindu, á typpið.

Össur segir margt hafa breyst í tattú-menningunni síðustu ár. Í dag fái fólk sér ekki tattú bara til að vera töff heldur hafi það oft einhverja dýpri merkingu fyrir þann sem fær sé tattúið.

„Eins og ég. Það nýjasta sem ég fékk mér undir hökunni. Á því stendur „fuck cancer“,“ segir Össur en það mætti þýða sem „Farðu til fjandans krabbamein“. Tattúið fékk hann sé þegar vinkona hans fékk krabbamein.

Margt breyst í húðflúrlistinni

Hann segir húðflúr list og. Menn séu að vanda sig enda sé ekki um að ræða pappír sem sé pakkað saman og hent í ruslið ef það mistekst.

Össur segir aðferðir líka hafa breyst. Nálar séu nú einnota og litirnir hafi breyst. Þeir séu öruggari í dag. Flúrin eldist betur í dag en þau gerðu áður.

Össur segir það ýmist planað eða ekki hvernig fólk tattúverar líkamann á sér. Sumir geri plan fyrir allan líkamann en hjá öðrum gerist það bara einhvern veginn. Þegar fólk er komið með mörg fari það svo að sjá staði þar þeim finnst vantar tattú.

„Þegar ég var búinn með nánast allan líkamann og horfði í spegilinn og það vantaði á rassinn á mér. Þetta var svo asnalegt,“ segir Össur og hann hafi ekki verið lengi að kippa því í liðinn.

Hvað varðar kostnaðinn segir Össur það misjafnt. Að þekja allan líkamann kosti í það minnsta átta til tíu milljónir. Minnst fimm milljónir. Hægt væri að klára það á einu ári ef tekið er tillit til þess hversu mikinn sársauka líkaminn þolir.

Þá segir Össur það einnig algengara í dag að konur séu með húðflúr en áður. Þær séu með hærri sársaukaþröskuld og láti það oft minna á sig fá að fá sér tattú á erfiðum stöðum.

„Ég segi oft við karlmenn að ef þetta er það versta sem þú hefur lent í þá hefurðu átt mjög gott líf.“