Í fréttatilkynningu um ráðninguna segir að Daði komi til Íslandsstofu frá Krónunni, þar sem hann hafi stýrt markaðs- og sjálfbærnimálum undanfarin tvö ár.
Hann sé þó öllum hnútum kunnugur hjá Íslandsstofu enda hafi hann starfað þar í átta ár, síðast sem fagstjóri neytendamarkaðssetningar til ársins 2022 en í því starfi hafi hann leitt markaðsherferðir á borð við Icelandverse, Let it Out og OutHorse. Áður hafi Daði meðal annars starfað fyrir Úrval Útsýn, RÚV og auglýsingastofuna Kapital.
Daði sé með MBA-gráðu frá Háskólanum í Reykjavík og BA-gráðu í hagfræði, með fjölmiðlafræði sem aukagrein, frá Háskóla Íslands.
Spenntur að snúa aftur
„Ég er mjög spenntur að ganga aftur til liðs við Íslandsstofu í nýju hlutverki og leiða áfram það frábæra markaðsstarf sem þar fer fram á alþjóðavísu. Tækfæri íslenskra útflutningsgreina eru á ýmsum sviðum og Íslandsstofa frábær vettvangur til að leiða saman hagsmunaaðila í markaðssókn fyrir Íslands hönd,“ er haft eftir Daða.
„Það er okkur mikil ánægja að fá Daða aftur heim til Íslandsstofu og ég býð hann innilega velkominn og hlakka til samstarfsins. Daði hefur dýrmæta reynslu og þekkingu sem munu nýtast frábærlega í þeim spennandi verkefnum sem framundan eru. Um leið vil ég þakka Sveini Birki fyrir hans störf á markaðssamskiptasviði Íslandsstofu undanfarin ár en hann mun áfram starfa að ýmsum verkefnum fyrir Íslandsstofu, meðal annars við undirbúning þátttöku Íslands á heimssýningunni í Osaka árið 2025,“ er haft eftir Pétri Óskarssyni, framkvæmdastjóra Íslandsstofu.
