Úkraína lenti undir á móti Slóvakíu en sótti 2-1 sigur í seinni hálfleik. Roman Yaremchuk setti sigurmarkið eftir glæsilega móttöku í teignum.
Slóvakía var við völd í upphafi og tók forystuna snemma á 17. mínútu. Snöggt innkast og sofandaháttur í úkraínsku vörninni skilaði sér í skallamarki hjá Ivani Schranz eftir flotta fyrirgjöf á fjærstöngina frá Lukasi Haraslin.
Úkraínumenn lifnuðu við eftir markið og áttu skot í stöng en tókst ekki að jafna áður en fyrri hálfleikur var allur.
En snemma í seinni hálfleik skoraði Úkraínumaðurinn Mykola Shaparenko eftir fyrirgjöf frá Oleksandr Zinchenko.
Þegar líða tók á voru Úkraínumenn líklegri aðilinn til að taka forystuna og gerðu það loks á 80. mínútu.
Roman Yaremchuk tók þar listilega vel við fyrirgjöf frá Mykola Shaparenko og laumaði boltanum framhjá markmanni Slóvaka.
Slóvakía sótti hart undir lokin í leit að jöfnunarmarki en Úkraína hélt út og fagnaði sínum fyrstu þremur stigum á mótinu.
