Einar býður Sunnu í kaffi og vill ræða á­burð um karl­rembu

Eins ólíklega og það hljómar nötrar hinn litli jassheimur á Íslandi svo um munar en það er eftir að Sunna Gunnlaugs ritaði grein sem hún birti á Facebook. Þar fjallar hún um Jazzhátíð Reykjavíkur og sakaði hún þá sem þar hefðu setið með henni í stjórn í kringum 2014 og árin þar á eftir um karlrembu. 

Þá vendir hún kvæði sínu í kross og segir af atviki; hún hafi fengið skilaboð frá Einari (sem er ónafngreindur í pistlinum) vegna þess að honum hafi borist til eyrna að hún bæði fólk að ráða hann ekki í bönd á tónleikaseríum þar sem hún kæmi fram. Hann vildi fá útskýringar á þessu. Allt þetta segir hún að undirlagi Feðraveldisins.

Segist alls ekki vera karlremba

Einar hefur hins vegar minna en engan áhuga á því að vera kenndur við það veldi. Hann hefur nú þegar svarað pistli Sunnu með tveimur ítarlegum færslum á Facebook og núna birtir hann grein á Vísi þar sem hann fer í saumana á málinu. Einar ætlar sér ekki að sitja undir þessu. Hann segir að þrátt fyrir kvíða og svefnleysi undanfarna daga muni hann halda ótrauður áfram að gera það sem hann gerir best sem er að búa til tónlist og spila með því frábæra tónlistarfólki sem Ísland á.

„Okkar litli jazzbransi má einfaldlega ekki við svona ósætti og langar mig því að bjóða aðilanum sem ritaði færsluna í kaffibolla þannig að við getum sett þetta leiðindamál aftur fyrir okkur og horft fram á veginn sameinuð en ekki sundruð. Ef í ljós kemur að ég hafi með einhverjum hætti sært hana ómeðvitað, þá mun ég að sjálfsögðu biðjast afsökunar.“

Hefur hætt sér út á jarðsprengjusvæði

Einar segist vita að hann tali fyrir hönd margra karlkyns-kollega að þeir fagni því ávallt þegar kvenkyns hljóðfæraleikarar og söngvarar bætist við jazzflóruna, sem og alla aðra flóru. Og hann vonar að Jazzhátíð Reykjavíkur, sem hefst eftir mánuð fái meiri umfjöllun í fjölmiðlum en þetta mál.

Einar segist hafa stigið á jarðsprengjur í umræðunni þar sem hugmyndafræði ráði öllu en ekki skynsemi. 

„Teorían hlýtur að vera rétt, jafnvel þótt raunveruleikinn sé rangur,“ segir Einar og vitnar í frænda sinn.

Hann hafi unnið sér það til óyndis að hafa efast um stefnu stjórnvalda á Covid-tímum og hann hafi ritað grein um forsetakosningarnar þar sem hann taldi það móðgun við heilbrigða skynsemi þegar „prófessor við Háskóla Íslands hélt því fram í fúlustu alvöru að kvenhatri væri um að kenna að margir vildu ekki sjá fyrrum forsætisráðherra fara yfir í forsætisembættið, jafnvel þótt þrír efstu frambjóðendurnir samkvæmt skoðanakönnunum væru konur.“

Fjarstæðukennd ásökun

Einar segist ekki vita hvort hann sé skotmark í slaufun, hvort hann hafi unnið til þess en vonar ekki. En grein Sunnu hafi komið eins „og þruma úr heiðskíru lofti“ sem birtist sem „ósmekkleg færsla á Fésbókinni fyrr í vikunni, þar sem ég, ásamt reyndar hálfum jazzbransanum, var t.d. sakaður um karlrembu og forréttindafrekju – hluti sem eru eins fjarri mínu eðli og hugsast getur.“

Einar segist hafa átt frábært samstarf við aragrúa fólks af báðum kynjum, hvort heldur sem tónlistamaður eða kennari, verið vel liðinn á öllum þessum stöðum og tel mig yfirhöfuð heppinn að eiga góða vini og samstarfsfólk í tónlistarbransanum óháð kyni.

„Svo þegar ein manneskja sem ég þekki lítið og hef aldrei starfað með sakar mig um fjarstæðukennda og áðurnefnda hluti, þá hlýtur það allt í einu að vera satt og rétt. Fjöldi fólks, m.a.s. samstarfsfólk mitt stökk á þennan vagn án þess að depla auga. Eins og Pétur frændi orðaði það: „teórían hlýtur að vera rétt, jafnvel þótt raunveruleikinn sé rangur.““